කාන්තාවන්ගේ ශ්‍රමය ඇගයෙන සාධාරණ සමාජයක් සහ සුරැකුම් ආර්ථිකයක් වෙනුවෙන් ජාතික සුරැකුම් පද්ධතියක්, (National Care Policy ) සැකසීම ඉතා වැදගත් බව අග්‍රාමාත්‍ය ආචාර්ය හරිනි අමරසූරිය පැවසුවාය.

පාර්ලිමේන්තු මන්ත්‍රීවරියන්ගේ සංසදය පාර්ලිමේන්තුවට ඉදිරිපත් කළ ජාතික සුරැකුම් පද්ධතියක් සකස් කළ යුතු බවට වන යෝජනාව පිළිබඳ අදහස් දක්වමින් අද ( 05) පාර්ලිමේන්තුවේදී අග්‍රාමාත්‍යතුමිය මේ බව ප්‍රකාශ කළාය.

ඒ පිළිබඳ වැඩිදුරටත් අදහස් දැක්වූ අග්‍රාමාත්‍යවරිය ,

“අද දින කාන්තා දිනය වෙනුවෙන් කාන්තා සංසදය ලෙස ජාතික සුරැකුම් ප්‍රතිපත්තියක් යෝජනා කරමින් ඉදිරිපත් කර ඇති මෙම යෝජනාව පිළිබඳව අදහස් දැක්වීමට ලැබීම පිළිබඳව ඇත්තටම ඉතාමත්ම සතුටු වෙනවා. විශේෂයෙන් මට එය සතුටට කාරණයක් වෙන්නේ අවුරුදු හයකට ප්‍රථමයෙන් පාර්ලිමේන්තුවේ මගේ මංගල කතාව කරන අවස්ථාවේ සුරැකුම් ආර්ථිකය ගැන මම කතා කරන විට මේ පාර්ලිමේන්තුව තුළ හිටියේ මන්ත්‍රීවරියන් කිහිපදෙනයි. මම හිතන්නේ එදා ඒ මාතෘකාව කතා කිරීමත් අලුත් දෙයක් වුණා.

නමුත් අද මම සතුටු වෙනවා අවුරුදු හයකට පසුව මේ මාතෘකාව කතා කරන්න අපිට ශක්තිමත් කණ්ඩායමක් පාර්ලිමේන්තුව තුළත් ඉන් පිටත් සිටීම පිළිබඳව. ඒ සංවාදය කොයිතරම් දියුණු වෙලා ද කියනවා නම් අද වනවිට අපේ ජාතික ප්‍රතිපත්තියක් දක්වා යෝජනා ගෙන ආ හැකි ආකාරයට ඒ මාතෘකාව පිටත සංවාද තුළත් පාර්ලිමේන්තුව තුළත් මෙලෙස ශක්තිමත් වී තිබෙනවා.

පළාත් පාලන ආයතනවල නායකත්වය හොබවමින් , ප්‍රජා සංවිධාන, රාජ්‍ය සේවය, අධ්‍යාපන ක්ෂේත්‍රයේ ඇතුළු සියලුම ක්ෂේත්‍රවල කාන්තා නියෝජනය ඉහළ ගොස් ඇති වටපිටාවක මෙවැනි තීරණාත්මක හා අතිශයින්ම වැදගත් මාතෘකාවක් පිළිබඳව සංවාදයක් ගොඩනැගීම ඉතාවැදගත්.

කාන්තා සහභාගිත්වය පොදුවේ මේ ක්ෂේත්‍ර තුළ දියුණු කර ශක්තිමත් කිරීමට නම්, කාන්තා සහභාගිත්වය පිළිගනිමින් ඇයට පුරවැසියෙක් ලෙස සියලුම ක්ෂේත්‍ර තුළ සමානවත්, ගෞරවණීය ලෙසත්, ඇයගේ අභිමතය අනුව සහභාගි වීමට ඇති අයිතිය පිළිගනිමින් ඒ වෙත පවතින ප්‍රධාන බාධක ඉවත් කිරීමට මැදිහත් විය යුතු යි.

කාන්තා දේශපාලනය වෙත වැඩි අවධානයක් යොමු වී ඇති මේ කාල වකවානුව තුළ කාන්තාවන්ට පුරවැසියන් ලෙස සමාජය, දේශපාලනය හා සංස්කෘතිය තුළ බියක් නැතිව ගෞරවණීය ලෙස මැදිහත් වීමට නම් මාධ්‍ය හා සමාජ මාධ්‍ය අවකාශ තළ ද ඇගේ ගෞරවණීය බව රැකෙන ආරක්ෂාව තහවුරු වන ලෙස එම අවකාශ සංවිධානය වීම පිළිබඳව ද අවධානය දිය යුතුයි. ඒ වගේම එය නීතිය භාවිතයෙන් නොව වෙනස් සමාජ පරිවර්තනයක් තුළ සිද්ධ විය යුතුයි. ඒ සමාජ පරිවර්තනය තුළ කාන්තාවන්ට යුක්තිය සාධාරණය ලැබිය යුතු, සියලු දෙනාට පුරවැසියන් ලෙස ගෞරවණීය හා සුරක්ෂිත ලෙස සමාන අවස්ථා සහිත සමාජයක් බලාපොරොත්තු වන බවත් අග්‍රාමාත්‍යවරිය පාර්ලිමේන්තුවේ දී ප්‍රකාශ කළාය.

අග්‍රාමාත්‍ය මාධ්‍ය අංශය

රාජ්‍ය සේවයේ කඩා වැටීම අවුරුදු ගණනාවක සිට සිදුවන බවත්, එයට හේතුව රාජ්‍ය සේවයේ බඳවා ගැනීම් නිවැරදිව සිදු නොවීම බවත්, ඒ අනුව ගැටලු නිරාකරණය කිරීමට සුදුසුකම් මත නිවැරදි ක්‍රමවේද අනුව රාජ්‍ය සේවයේ බඳවා ගැනීම් සිදු කරමින් තිබෙන බව අග්‍රාමාත්‍ය ආචාර්ය හරිනි අමරසූරිය පැවසුවාය.

රජයේ මුද්‍රණාලය සම්බන්ධයෙන් විපක්ෂ මන්ත්‍රී රවී කරුණානායක ඇසු ප්‍රශ්නයට පිළිතුරු ලබාදුන් අග්‍රාමාත්‍යතුමිය අද (04) පාර්ලිමේන්තුවේදී මේ බව පැවසීය.

වැඩිදුරටත් අදහස් දැක් වූ අග්‍රාමාත්‍යතුමිය,

ශ්‍රි ලංකා මුද්‍රණ සේවා ව්‍යවස්ථාවට අනුව අවශ්‍ය සුදුසුකම් සම්පූර්ණ කරන දෙපාර්තමේන්තුගත නිලධාරීයෙක් මේවන විට රජයේ මුද්‍රණ දෙපාර්තමේන්තුව තුළ නොමැති නිසා මුද්‍රණ දෙපාර්තමේන්තුවේ අවශ්‍ය කටයුතු අඛණ්ඩව සිදු කරගෙන යාමට රාජ්‍ය පරිපාලන සේවයේ විශේෂ⁣ ශ්‍රේණියේ සිටින සුදුසුකම් සහ අත්දැකීම් ඇති නිලධාරියෙක් අමාත්‍ය මණ්ඩල අණුමැතිය ඇතිව පත්කිරීමට කටයුතු කර තිබෙනවා. රහස්‍ය සහ ආරක්ෂක මුද්‍රණ ආදියට සම්බන්ධ මාර්ගගතව සිදුකළ කිසිදු කාර්යයක් අඩු කර නැහැ. ඒ කටයුතුවල ගුණාත්මකභාවය, රහස්‍යභාවය සහ කාර්යය පටිපාටි මත කටයුතු කරගෙන යාමට රජය විශේෂයෙන් අවධානය යොමු කරමින් කටයුතු කරනවා. ඒ වගේම පුර්ණකාලීන නිලධාරියෙක් පත්කර ගැනීමේ කටයුතු සිදු කරමින් තිබෙනවා. රාජ්‍ය සේවයේ කඩා වැටීම අවුරුදු ගණනාවක් තිස්සේ සිදු වුණා. ඒකට නිශ්චිත හේතුත් අපි දන්නවා. රාජ්‍ය සේවයේ බඳවා ගැනීම් නිවැරදිව සිදු නොවීම තමයි ප්‍රධාන හේතුව, රජයේ මුද්‍රණාලයට පමණක් නෙමෙයි ආයතන ගණනාවකට මේ නිසා ගැටලු මතුවෙලා තිබෙනවා. ඒ ගැටලු නිරාකරණය කිරීමට සුදුසුකම් මත නිවැරදි ක්‍රමවේද අනුව රාජ්‍ය සේවයේ බඳවා ගැනීම් සිදු කරමින් තිබෙන බවද අග්‍රාමාත්‍යතුමිය පැවසීය.

මෙවර මහ කන්නයේ වී මිළදී ගැනීම පිළිබඳ මන්ත්‍රිවරයෙකු නැගූ ප්‍රශ්නයකට පිළිතුරු ලබා ⁣දුන් අග්‍රාමාත්‍ය ආචාර්ය හරිනි අමරසූරිය,

2025/2026 මහ කන්නයේ වී අස්වැන්න නාඩු 120ත්, සම්බා 130ත්, කීරි සම්බා 140ත් ලෙස මිලදී ගැනීමට කටයුතු කරනවා. ඒ වගේම වී මිළදී ගැනීම සඳහා වී අළෙවි මණ්ඩලයේ ගබඩා විවෘතව තිබෙනවා. වී මිළ දී ගැනීමට සහතික මිළක් නියම කරලා, ප්‍රමිතියෙන් යුතු වී අස්වැන්න, වී අළෙවි මණ්ඩලය විසින් මිළදී ගන්නවා. ඒ සඳහා වී අලෙවි මණ්ඩලයේ ගබඩා ප්‍රතිසංස්කරණය කරමින්, වී මෙට්‍රික් ටොන් දෙලක්ෂ පනස් දහස දක්වා ධාරිතාව වර්ධනය කරලා ඒ අනුව වී මිළදී ගැනීමට අවශ්‍ය ප්‍රතිපාදනත් වෙන් කර තිබනවා.

පෙබරවාරි 16 සිට 20 දක්වා ඉන්දියාවේ පැවති 2026 කෘත්‍රිම බුද්ධි සමුළුව සම්බන්ධයෙන් මතු වූ පැනයට අග්‍රාමිත්‍යතුමිය මෙසේ පිළිතුරු ලබා දුන්නාය.

කෘත්‍රීම බුද්ධි අංශයෙන් ගෝලීය දක්ෂිණ අංශයේ පැවත් වූ පළමු සමුළුව. ජනතාව, ලෝක ප්‍රජාව සහ ප්‍රමිතිය යන අංශ යටතේ කෘත්‍රිම බුද්ධි පාලනයේ අනාගතය හැඩගැස්වීම සාකච්ඡා කිරීම අරමුණු කරගනිමින් එම සමුළුව පැවත්වුණා. මානව ප්‍රාග්ධනය, සමාජ බලගැන්වීම සඳහා සියල්ලන් ඇතුළත් කිරීම, ආරක්ෂිත සහ විශ්වාසදායී කෘත්‍රිම බුද්ධි තාක්ෂණය, විද්‍යාව, ඔ⁣රොත්තු දීමේ හැකියාව, නවොත්පාදන සහ කාර්යක්ෂමතාව,කෘත්‍රිම බුද්ධි සම්පත් ප්‍රජාතන්ත්‍රීකරණය කිරීම , ආර්ථික සංවර්ධනය සඳහා කෘත්‍රීම බුද්ධිය යොදා ගැනීම යන ක්ෂෙත්‍ර පිළිබඳව එහිදී සාකච්ඡා කළා. ඉන්දියානු අග්‍රාමාත්‍ය නරේන්ද්‍ර මෝදි මහතාගේ ආරාධනය පරිදි ජනාධිපති අනුර කුමාර දිසානායක මහතා ඒ සමුළුවට සහභාගී වීම තුළින් ද්විපාර්ෂික හවුල්කාරීත්වය තවදුරටත් ශක්තිමත් වීමත්, වගකිවයුතු සියල්ලන් ඇතුළත් කෘත්‍රිම බුද්ධියක් සඳහා වූ කැපවීම නැවත තහවුරු කිරීමට ශ්‍රි ලංකාවට අවස්ථාව ලැබුණා.

රාජ්‍ය නායක මට්ටමින් ශ්‍රී ලංකාවේ සහභාගිත්වය නිසා ශ්‍රි ලංකාවේ ස්ථාවරය මෙන්ම මේ ක්ෂේත්‍රය කෙරෙහි ඇති උනන්දුව ජාත්‍යන්තරව පෙන්වන අවස්ථාවක් ද වූ බව අග්‍රාමාත්‍ය ආචාර්ය හරිනි අමරසූරිය පැවසුවාය.

අග්‍රාමාත්‍ය මාධ්‍ය අංශය

මාර්තු 2 වන අධ්‍යාපන අමාත්‍යාංශයේදී අග්‍රාමාත්‍ය ආචාර්ය හරිනි අමරසූරිය සහ ආසියානු සංවර්ධන බැංකුවේ (ADB) නිලධාරීන් අතර හමුවක් පැවති අතර එහිදී ආසියානු සංවර්ධන බැංකුවේ (ADB) නිලධාරීන් විසින් අධ්‍යාපනය සඳහා මානව සම්පත් සංවර්ධන කිරීමේ ව්‍යාපෘතිය (HRDEP) පිළිබඳව අග්‍රාමාත්‍යවරිය දැනුවත් කරන ලදී.

මෙම සාකච්ඡාවේදී උසස් පෙළ අධ්‍යාපනයේ ගුණාත්මකභාවය වැඩි දියුණු කිරීම සහ විෂයමාලාව සැකසීම, අධ්‍යාපනික ක්ෂේත්‍රයේ ශ්‍රම බලකායේ ගුණාත්මකභාවය සහ කාර්යක්ෂමතාව ශක්තිමත් කිරීම මෙන්ම අධ්‍යාපන අංශ කළමනාකරණ සැලැස්ම වැඩිදියුණු කිරීම කෙරෙහි අවධානය යොමු විය.

අධ්‍යාපන අංශය ඩිජිටල්කරණය කිරීමේ ක්‍රියාවලිය සඳහා තාක්ෂණික සහාය සහ කුසලතා පරිපූර්ණ මානව සම්පතක අවශ්‍යතාවය පිළිබඳ අවධාරණය කළ අග්‍රාමාත්‍යවරිය එවැනි ක්‍රමවත් පද්ධතියක් සංවර්ධනය කිරීම මඟින් සියලු අංශ ආවරණය වන ලෙස ජාතික සංවර්ධනයට දායකත්වය ලබා දිය හැකි ශක්තිමත් මානව සම්පතක් ගොඩනැගීම රජයේ බලාපොරොත්තුව වන බව සඳහන් කළා ය.

රජය ගෙන යන අධ්‍යාපන ප්‍රතිසංස්කරණ ක්‍රියාවලියට සිය සහාය ලබා දීමට කැමති බව ADB නිලධාරීන් මෙහිදී සඳහන් කළහ. මෙම ප්‍රතිසංස්කරණ ඉදිරියට ගෙන යාම සඳහා තාක්ෂණික සහාය මෙන්ම ජාත්‍යන්තර මූල්‍ය පහසුකම් ලබා දීමට ඔවුන්ගේ සූදානම ද තහවුරු කළහ.

මෙම අවස්ථාවට ආසියානු සංවර්ධන බැංකුවේ නිලධාරීන්, තාක්ෂණික විශේෂඥයින් සහ අධ්‍යාපන අමාත්‍යාංශ ලේකම් නාලක කළුවැව මහතා සහභාගී විය.

අග්‍රාමාත්‍ය මාධ්‍ය අංශය

රජය මේ රට නව පරිවර්තනීය යුගයක් කරා රැගෙන යන්නට විශාල වැඩ කොටසක් සිදුකරමින් සිටින බවත්, ඒ නව යුගය වෙනුවෙන් ජනතාව වෙත පුළුල් සමාජීය මෙහෙවරක් සිදු කරන ස්වාමීන්වහන්සේලාගේ මෙන්ම ආගමික නායකයින්ගේ මඟපෙන්වීම, අනුශාසනා සහ උපකාර රජයට ඉතා වැදගත් බවත් අග්‍රාමාත්‍ය ආචාර්ය හරිනි අමරසූරිය පැවසුවාය.

උව, වෙල්ලස්ස හා නැගෙනහිර තෙපළාතේ සංඝනායක පදවියෙන් පිදුම් ලැබූ පූජ්‍යපාද ගංගොඩගම විමලරත්න නාහිමියන්ට සංඝනායක පදවිය පිළිබඳ සන්නස්පත්‍රය පිරි⁣නැමීමේ අවස්ථාවට සහභාගී වෙමින් මාර්තු 01 දින බුත්තල සංස්කෘතික මධ්‍යස්ථානයේදි අග්‍රාමාත්‍ය ආචාර්ය හරිනි අමරසූරිය මේ බව පැවසීය.

ඌව අමරපුර මහා නිකායේ අභිනව නායක ස්වාමින්ද්‍රයන් වහන්සේ වෙත සන්නස් පත්‍ර පිළිගැන්වීම අග්‍රාමාත්‍ය ආචාර්ය හරිනි අමරසූරිය විසින් සිදු කළ අතර ඌව පළාත් ආණ්ඩුකාර නීතිඥ කපිල ජයසේකර මහතා විසින් විජිනිපත අභිනව නායක මාහිමිපාණන් වහන්සේ වෙත පූජා කරන ලදී.

මෙහිදී අභිනව සංඝනායක ධුරයෙන් පිදුම් ලැබූ නායක හිමියන් වෙත සුභාශිංසන එක් කරමින් අග්‍රාමාත්‍ය ආචාර්ය හරිනි අමරසූරිය, මෙසේද පැවසීය.

ඌව පළාත කියන්නේම අපේ රටට ඉතා සුවිශාල ශාසනික මෙහෙවරක් ඉටුකළ සඟ පරපුරක් බිහි වූ පළාතක්. අපේ නායක ස්වාමීන් වහන්සේ ද ඒ මඟ යමින් උන්වහන්සේගේ 60 වසරකට වැඩි පැවිදි ජීවිතය තුළ ධර්මයෙන් පමණක් නොවෙයි වෛද්‍ය ශාස්ත්‍රය පිළිබඳ දැනුමෙන් ද මේ ප්‍රදේශයට, මේ පළාතේ ජනතාවට විශාල සේවාවක් ඉටු කළා.

උප ගුරුවරයෙක් , පරිවේණාධිපති වහන්සේ නමක් මෙන්ම විදුහල්පතිවරයෙක් ලෙස දිවයිනේ විවිධ ප්‍රදේශවල අධ්‍යාපන සේවයේ කටයුතු කරමින් උන්වහන්සේගේ දැනුමෙන් අපේ රටේ දරු පරපුර පෝෂණය කරන්නට විශාල දායකත්වයක් දැක්වූ බව අපි දන්නවා.

විශේෂයෙන්ම මේ පළාතේ ඉගෙනීමට අතහිත ලැබිය යුතු සිසු දරුවන්ට 06 ශ්‍රේණියේ සිට විශ්වවිද්‍යාල අධ්‍යාපනය දක්වාම අවශ්‍ය මූල්‍යමය ආධාර ලබා දීම සහ අනෙකුත් පහසුකම් සැපයීමට මූලිකත්වය ගැනීම, හැකි සෑම විටෙකම පිහිටක් අවැසි ජනතාව වෙනුවෙන් උපකාර කිරීම, ප්‍රදේශයේ දරුවන්ගේ දහම් දැනුම වැඩිදියුණු කිරිම වෙනුවෙන් දහම් පාසල් ආරම්භ කිරීම වැනි අපේ නායක ස්වාමීන් වහන්සේගේ මූලිකත්වයෙන්, මග පෙන්වීමෙන් වගේම උන්වහන්සේගේ කැපවීමෙන් සිදු කරන ලද සමාජ මෙහෙවර ද මේ මොහොතේ සිහිපත් කළ යුතුයි.

නව රජයක් ලෙස අපි මේ රට නව පරිවර්තනීය යුගයක් කරා රැගෙන යන්නට විශාල වැඩකොටසක් සිදුකරමින් ඉන්නවා. ඒ නව යුගය තුළ ඔබවහන්සේ මෙන් ජනතාව වෙනුවෙන් පුළුල් සමාජීය මෙහෙවරක යෙදෙන ආගමික නායකයින්ගේ මඟපෙන්වීම සහ උපකාරය රජයට ඉතා වැදගත්.

ඒ වගේම පසුගිය වසරේ ඇතිවූ ’දිත්වා’ සුළි කුණාටුවේ විශාල බලපෑමක් ඌව පළාතට විශේෂයෙන්ම බදුල්ල දිස්ත්‍රික්කයට සිදුවුණා. දැන් අපි ඒ පීඩාවන්ගෙන් ටිකෙන් ටික සුවපත් වෙමින් ශක්තිමත්ව නැගී සිටින කාල වකවානුවක ඉන්නේ.

ඒ ව්‍යසනයෙන් තමන්ගේ සමීපතමයන්ගේ ජීවිත පවා අහිමි කරගනිමින් ඒ සියලු පීඩාවන් දරාගනිමින් නැවතත් අලුතින් ගොඩනැගෙමින් සිටින ඌව වෙල්ලස්ස හා නැගෙනහිර ජනතාවට ශක්තියක් වීමට අභිනව සංඝනායක ධූරයෙන් පිදුම් ලැබූ ඔබ වහන්සේට හැකිවන බව මට විශ්වාසයි.

අමරපුර මහා නිකායේ ඌව පාර්ශවයේ අනුනායක බදුල්ල මයිලගස්තැන්න බෝධිරුක්ඛාරාමාධිපති පුජ්‍ය වතුපිටියේ ඥාණානන්ද ස්වාමීන්වහන්සේ ප්‍රධාන සංඝ රත්නය,ඌව පළාත් ආණ්ඩුකාර නීතීඥ කපිල ජයසේකර, වෙළඳ, වාණිජ හා ආහාර සුරක්ෂිතතා නියෝජ්‍ය අමාත්‍ය ආර්.එම්. ජයවර්ධන, පාර්ලිමේන්තු මන්ත්‍රී රුවන් විජේවීර යන මහත්වරුන්, ප්‍රාදේශිය සභා මන්ත්‍රිවරුන්, බුත්තල ප්‍රාදේශිය ලේකම්, දිස්ත්‍රික් ලේකම්තුමන් ඇතුළු පිරිසක් මෙම අවස්ථාවට සහභාගී වූහ.

අග්‍රාමාත්‍ය මාධ්‍ය අංශය

පාසල් යටිතල පහසුකම් සංවර්ධනය කර ගැනීමට අවශ්‍ය ඉල්ලීම් ඉදිරිපත් කරන්න

පළාත් පාසල්වල යටිතල පහසුකම් සංවර්ධනය සඳහා අවශ්‍ය ප්‍රතිපාදන සියලු පාළාත් වෙත ලබා දී ඇති බවත්. එම ප්‍රතිපාදන නිසි ලෙස පාසල් සංවර්ධනයට යොදා ගන්නා ලෙසත්, ඒ අනුව පාසල්වල පවතින අඩුපාඩු සකස් කර ගැනීම සඳහා ඉල්ලීම් ඉදිරිපත් කරන ලෙසත් අග්‍රාමාත්‍ය ආචාර්ය හරිනි අමරසූරිය පැවසුවාය.

රාමසාන් උත්සවය සමරන වැල්ලවාය ප්‍රදේශයේ මුස්ලිම් කාන්තාවන් සමඟ මාර්තු 01 දින පැවති සුහද හමුවකදී අග්‍රාමාත්‍ය ආචාර්ය හරිනි අමරසූරිය මේ බව පැවසීය.

අනතුරුව ඌව වෙල්ලස්ස දෙදිසාවේ ප්‍රධාන සංඝනායක යුධගනාව රාජමහා විහාරාධිපති රාජකීය පණ්ඩිත අතිපූජ්‍ය ගල්ටැම්වත්තේ නන්දරතන නායක හිමියන් බැහැදැකීමට පැමිණි අග්‍රාමාත්‍යතුමිය නව අධ්‍යාපන ප්‍රතිසංස්කරණ වැඩසටහනේ වත්මන් තත්ත්වය පිලිබඳ පැහැදිලි කිරීමක් සිදු ක⁣ළාය.

වෘත්තීය අධ්‍යාපනයට නිසි පිළිගැනීමක් ලබා දෙමින් දිස්ත්‍රීක් 25ම ආවරණය වන පරිදි නවීන පාඨමාලාවන්ගෙන් යුතු වෘත්තීය අධ්‍යාපන මධ්‍යස්ථාන 50ක් සංවර්ධනය කිරීමට කටයුතු කරන බවත්, 2027 වසරේ සිට 6 ශ්‍රේණිය සඳහා නව අධ්‍යාපන ප්‍රතිසංස්කරණ හදුන්වා දීමට කටයුතු කරන අතර නව පෙළපොත් මුද්‍රණ කටයුතු අධ්‍යාපන අමාත්‍යංශයේ ප්‍රකාශන දෙපාර්තමේන්තුව වෙත ලබා දීමට කටයුතු කරන බවද පැවසීය.

ඌව පළාත් ආණ්ඩුකාර නීතීඥ කපිල ජයසේකර, වෙළඳ, වාණිජ හා ආහාර සුරක්ෂිතතා නියෝජ්‍ය අමාත්‍ය ආර්.එම්. ජයවර්ධන, පාර්ලිමේන්තු මන්ත්‍රී රුවන් විජේවීර යන මහත්වරුන්, ප්‍රාදේශිය සභා මන්ත්‍රිවරුන්, බුත්තල ප්‍රාදේශිය ලේකම්, දිස්ත්‍රික් ලේකම්තුමන් ඇතුළු පිරිසක් මෙම අවස්ථාවට සහභාගී වූහ.

අග්‍රාමාත්‍ය මාධ්‍ය අංශය

ශිෂ්‍ය නිදහස සීමා කරන්න කිසිසේත් කටයුතු කරන්නේ නැහැ. ශිෂ්‍ය ක්‍රියාකාරකම් පදනම් කරගෙන සිදුවන හිංසන සහ නවක වදය නතර කරන්න ශිෂ්‍ය සංගම් සහය දෙන්න

වෛද්‍ය අධ්‍යාපනය පිළිබඳ ජාතික ප්‍රතිපත්තියක අවශ්‍යතාව ශිෂ්‍ය සංගම් විසින් අවධාරණය කිරීමෙන් අනතුරුව ඒ සඳහා කමිටුවක් පත් කරන ලෙසත්, ප්‍රතිපත්තිය සකස් කිරීම සඳහා ශිෂ්‍ය සංගම්වල අදහස් ලබා දෙන ලෙසත් අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.

වෛද්‍ය පීඨ ශිෂ්‍ය ක්‍රියාකාරී කමිටුවේ සාමාජිකයින් සහ අග්‍රාමාත්‍ය ආචාර්ය හරිනි අමරසූරිය අතර පෙබරවාරි 27 අරලියගහ මන්දිරයේ පැවති සාකච්ඡාවකදී අග්‍රාමාත්‍යතුමිය මේ බව පැවසුවාය.

වෛද්‍ය පීඨ ශිෂ්‍ය ක්‍රියාකාරී කමිටුව මෙහිදී විශ්වවිද්‍යාල තුළ මුහුණ දෙන ගැටලු පිළිබඳ කරුණු පැහැදිළි කළේය.

විශ්වවිද්‍යාල ශිෂ්‍යයන්ගේ නිදහස කිසිසේත් සීමා කිරීමක් සිදු නොකරන බවත්, ඉදිරියේදී ඒ පිළිබඳ උපකලපතිවරුන් සමඟ සාකච්ඡා කරන බවත් අග්‍රාමාත්‍යතුමිය මෙහිදී පැවසුවාය.

වෛද්‍ය උපාධිය ලැබූ උපාධිධාරීන් සඳහා සීමා වාසික පුහුණුව ලබා දීමේ ප්‍රමාදයට හේතුව නේවාසික ගැටලුව බවත් ඒ සඳහා ක්‍රියාමාර්ග ගැනීමට සෞඛ්‍ය අමාත්‍යංශය කටයුතු කරන අතර සීමාවාසික පුහුණුව ලබා දීම තවදුරටත් වැඩි කිරීම සඳහා රෝහල් පහක් සඳහා අනුමැතිය ඉල්ලා ඇති බවද සෞඛ්‍ය අමාත්‍යංශයේ නිලධාරීන් මෙහිදී පෙන්වා දුන්නේය.

වයඹ, කුරුණැගල, කුලියාපිටිය, සබරගමුව, මොරටුව ඇතුළු විශ්ව විද්‍යාලවල නේවාසික ගැටලු විසඳීම සඳහා නව නේවාසිකාගාර ඉදිකිරීම සඳහා මේවන විට මුදල් වෙන් කර ඇති අතර ඉඩම් පැවරීමේ කටයුතු සිදු කළ වහාම නේවාසිකාගාර ඉදිකිරීම් ආරම්භ කරන බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යංශයේ නිලධාරීන් මෙහිදී අවධාරණය කළේය. කුරුණෑගල සහ කුලියාපිටිය පිඨවල පුහුණුව සඳහා යන වෛද්‍ය උපාධිධාරීන් මුහුණ දෙන ප්‍රවාහන ගැටලුවට විසඳුමක ලෙස ලංකා ගමනාගමන මණ්ඩලය සමග සාකච්ඡා කර ඉදිරියේදී විසඳුමක ලබාදීම කෙරහිද මෙහිදී අවධානය යොමු කෙරිණ.

වෛද්‍ය පීඨවල පහසුකම් සංවර්ධනය කිරීම පිළිබඳව ද අවධානය යොමු වී ඇති බවත්, පශ්චාත් සීමාවාසික පත්වීම් ලබාදීම නතර කිරීමට කිසිදු තීරණයක් ගෙන නැති බවද මෙහිදී අනාවරණය විය.

අග්‍රාමාත්‍ය ලේකම් ප්‍රදීප් සපුතන්ත්‍රි, විශ්වවිද්‍යාල ප්‍රතිපාදන කොමිෂන් සභාවේ සභාපති ජ්‍යෙෂ්ඨ මහාචාර්ය කපිල සෙනෙවිරත්න යන මහත්වරුන්, අධ්‍යාපන අමාත්‍යංශය, සෞඛ්‍ය අමාත්‍යංශය නියෝජනය කරමින් නිලධාරීන් සහ වෛද්‍ය පීඨ ශිෂ්‍ය ක්‍රියාකාරී කමිටුවේ කැදවුම්කරු නවෝද්‍ය මාරසිංහ ඇතුළු සාමාජිකයින් පිරිසක් මෙම අවස්ථාවට සහභාගි වුහ.

අග්‍රාමාත්‍ය මාධ්‍ය අංශය