සියලු පුරවැසියන් සාමයෙන් , සමගියෙන් ජීවත්වන රටක් ඊළඟ පරම්පරාවට ලබා දෙන්න අපට අවශ්‍යයි.
සියලු පුරවැසියන් සාමයෙන් , සමගියෙන් ජීවත්වන රටක් ඊළඟ පරම්පරාවට ලබා දෙන්න අවශ්‍ය බව හා ජනතාවට ඇහුම්කන් දෙන්න රජය සුදානම් බව අග්‍රාමාත්‍ය ආචාර්ය හරිනි අමරසූරිය පැවසුවාය.
වන්නි මැතිවරණ දිස්ත්‍රික්කයේ සෙට්ටිකුලම් මැණික් ෆාම් ප්‍රජා සංවර්ධන මධ්‍යස්ථානයේ සහ උක්කුලන්කුලම ක්‍රීඩාංගනයේ අප්‍රේල් 20 දින පැවති ජන හමු අමතමින් අග්‍රාමාත්‍යවරිය මේ බව පැවසීය.
"අපේ ඉතිහාසයේ වැඩිම මන්ත්‍රීවරියන් පිරිසක් පාර්ලිමේන්තුවට තේරී පත් වී ඇති පාර්ලිමේන්තුව තමයි මේ. මීට පෙර පාර්ලිමේන්තුවේ මන්ත්‍රීවරු 225 ට ම මන්ත්‍රීවරියන් හිටියේ 5% ටත් අඩුවෙන්. නමුත් මේ රටේ ජනගහනයෙන් 52%ක් ම කාන්තාවන්.
මේ රටේ ආර්ථිකය රැකගන්න, පවුල් සංස්ථාව පවත්වාගෙන යන, සමාජය පවත්වාගෙන යන්න විශාල වැඩකොටසක් කරන ගැහැනු අපට පැවති නියෝජනය ඉතාමත් අඩුයි. ඉතින් අපි ඔබෙන් ඉල්ලා සිටින්නෙ ඊලඟ මැතිවරණයේ දී වන්නි දිස්ත්‍රික්කයෙන් සහෝදර මන්ත්‍රීවරුන් පමණක් නොවෙයි මන්ත්‍රී සහෝදරියන් වැඩි පිරිසක් පාර්ලිමේන්තු එවන්න කියලා.
වවුනියාව කියන්නේ මේ වන විට දියුණු වෙන නගරයක්. මිනිසුන්ට ප්‍රාදේශීය සභාවකින් සිද්ධ විය යුතු දේවල් සිද්ධ වෙන්න ඕන. ගමේ දියුණුවට ප්‍රාදේශීය සභාව සක්‍රීයව මැදිහත් වෙන්න ඕන.
අධ්‍යාපනය කියන්නේ උතුරේ ජනතාවට ඉතා වැදගත් දෙයක් කියලා අපි දන්නවා. ඔබ අධ්‍යාපනයට ලොකු වටිනාකමක් දෙනවා. පොදුවේ රටේ අධ්‍යාපනයේ නාස්තිවෙලා දුර්වල වෙලා තියෙන්නේ. විශේෂයෙන් උතුරට අධ්‍යාපන ක්ෂේත්‍රය සම්බන්ධයෙන් දිය යුතු අවධානය නොදීම නිසා වෙනත් ප්‍රදේශවලටත් වඩා දුෂ්කර වෙලා තියෙනවා. මේ අතර මට තවත් වඩාත් භයානක දෙයක් දැනගන්න ලැබුණා. තරුණ තරුණියන් අධ්‍යාපනයට තියෙන වටිනාකම එන්න එන්න අඩුවෙලා තියෙනවා. මත්ද්‍රව්‍ය හා අරක්කු සුලභව දැන් හැමතැනම තියෙනවා. ඒවයෙන් වැලකිලා තරුණ තරුණියන්ට සතුටු වෙන්න අවශ්‍ය මාර්ග මෙහෙ නෑ. විද්‍යාව, කලාව, නාට්‍ය වැනි ක්ෂේත්‍ර දියුණු නොවීම තුළ ඔවුන්ට සතුටු වීමට මාර්ග නැති වෙලා තියෙනවා. ඒ නිසා මේකට විශාල මැදිහත්වීමක් අවශ්‍යයි කියලා මම අවබෝධ කරගත්තා.
ඔබ දුෂණයෙන් තොර පිරිසක් තෝරගත්තොත් අපිට ඔබ වෙනුවෙන් වෙන් කරන මුදල් බය නැතුව ඔවුන් අතට පත්කරන්න පුළුවන්. ඔබ වෙනුවෙන් ඔබේ ගමේ දියුණුව වෙනුවෙන් යොදවන්න. ඒ නිසයි ඔබේ තේරීම අපිට වැදගත් වෙන්නේ."යැයි අග්‍රාමාත්‍යවරිය පැවසුවාය.
මෙම හමුවලට සමූපකාර සංවර්ධන නියෝජ්‍ය අමාත්‍ය උපාලි සමරසිංහ, වවුනියා දිස්ත්‍රික් පාර්ලිමේන්තු මන්ත්‍රී එස්. තිලකනාදන් සහ පාර්ලිමේන්තු මන්ත්‍රී එම්. ජෙගදීශ්වරන් යන මහත්වරුන් ඇතුළු පළාත් පාලන මැතිවරණ අපේක්ෂකයින් හා ප්‍රදේශවාසීන් රැසක් සහභාගී වූහ.
අග්‍රාමාත්‍ය මාධ්‍ය අංශය