සුරක්ෂා කඳවුරුවල සිටින දරුවන්ගේ මානසික සෞඛ්‍ය පිලිබඳ වැඩි අවධානයක් යොමු කළ යුතුයි.

ජන ජීවිතය සමාන්‍ය තත්ත්වයට පත්කිරීම සඳහා රජය ලබා දිය හැකි උපරිම සහන සහ ප්‍රතිපාදන ලබා දෙන බවත්, ජනතාවට කඩිනමින් අවශ්‍ය සහන ලබා දෙමින් ජන ජීවිතය යථාතත්ත්වයට පත් කිරීමට නම් ප්‍රාදේශිය මට්ටමේ නිලධාරීන්ගේ කාර්යක්ෂම සහයෝගය අවශ්‍ය බවත් අග්‍රාමාත්‍ය ආචාර්ය හරිනි අමරසූරිය පැවසුවාය.

පැවති ආපදා තත්ත්වය හමුවේ මහනුවර දිස්ත්‍රික්කයට සිදු වූ හානියෙන් අවතැන් ජනතාව වෙත සහන ලබාදීමේ සහ ජන ජීවිතය යථාතත්ත්වයට පත් කිරීමේ කටයුතු පිළිබඳ නිරීක්ෂණය කිරීමෙන් අනතුරුව මහනුවර උඩපළාත ප්‍රදේශීය ලේකම් කාර්යාලයේ දෙසැම්බර් 07 දින පැවති ආපදා කළමනාකරණ කමිටු සාකච්ඡාවේදි අග්‍රාමාත්‍යතුමිය මේ බව පැවසීය.

ගෙලිඔය, උඩපලාත, දොළුව ප්‍රදේශවල ආපදාවෙන් සිදු වූ හානිය සහ සහන සැපයීම් කටයුතුද අග්‍රාමාත්‍යතුමියගේ නිරීක්ෂණයට ලක්විය.

උඩපළාත සහ දොළුව ප්‍රදේශය ආවරණය වන පරිදි විදුලිය බිඳවැටීම් බොහෝ දුරට යථාතත්වයට පත්කර ඇති බවත්, ප්‍රධාන මාර්ග මේ වනවිට විවෘතව පවතින බවත් අනෙකුත් ග්‍රාමීය මාර්ග පිරිසිදු කරමින් පවතින බවත් මෙහිදී නිලධාරීන් පැවසීය. ප්‍රදේශයට අවශ්‍ය පානීය ජල සැපයුම් ලබා දෙමින් පවතින අතර සන්නිවේදන බිඳවැටීම් යථාතත්ත්වයට පත් වූ පසු බැංකු කටයුතු නිසි පරිදි සකස් කරන බවත් නිලධාරීන් පැවසීය.

මෙහිදී අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

ආපදාවට ලක් වූ රටේ ජන ජීවිත වගේම ආර්ථිකය යථා තත්ත්වයට පත් කිරීමට හැකි වන්නේ අප සියලු දෙනා නම්‍යශීලී භාවයෙන් යුක්තව හා කැපවීමෙන් සිදු කරනු ලබන කාර්යභාරය මත පමණයි, විශේෂයෙන් සුරක්ෂා කඳවුරුවල සිටින දරුවන්ගේ මානසික සෞඛ්‍ය පිළිබඳ අපි වැඩි අවධානයක් යොමු කළ යුතුයි.

මේ වගේ බිහිසුණු ව්‍යසනයක් යටතේ ජනතාවගේ ජීවිත රැක ගන්න අපිට හැකි වුණේ මෙවැනි අපදා තත්වයන් පිළිබඳ අත්දැකීම් තිබුණත් නැතත් ඔබ කළ කැප කිරීම නිසයි.

මේ අතිශය දුෂ්කර අවස්ථාවේදී රාජකාරී ඉක්මවා යමින් සිදු කළ කැපකිරීම වෙනුවෙන් සියලු දෙනාට සිය ස්තූතිය පුද කරන බවද අග්‍රාමාත්‍ය ආචාර්ය හරිනි අමරසූරිය පැවසුවාය.

මහනුවර දිස්ත්‍රීක් පාර්ලිමේන්තු මන්ත්‍රීවරුන් වන පෂ්මින් ෂරීෆ්, තනුජ දිසානායක, අතිරේක දිස්ත්‍රික් ලේකම් ලලිත් ඇටම්පාවල, උඩ පළාත් ප්‍රාදේශිය ලේකම් ආත්මා ජයරත්න, දොළුව ප්‍රාදේශිය ලේකම් යමුණා දයාරත්න යන මහත්ම මහත්මීන් ද, විදුලිය බලමණ්ඩලය, ජලසම්පාදන මණ්ඩලය, මාර්ග සංවර්ධන අධිකාරිය, පොලීසිය, ආපදා කළමණාකරණ මධ්‍යස්ථානය යන ආයතන නියෝජනය කරමින් නිලධාරීන් ද මෙම අවස්ථාවට සහභාගී විය.

අග්‍රාමාත්‍ය මාධ්‍ය අංශය

පැවති ආපදා තත්ත්වය හමුවේ මෙරට සිටින සංචාරක ප්‍රජාවට කිසිදු අනතුරක් හෝ හානියක් සිදුවී නැහැ

ශ්‍රී ලංකාවේ සිටින රාජ්‍ය තාන්ත්‍රික නියෝජිතයින් දැනුවත් කිරීමේ විශේෂ වැඩසටහනක් දෙසැම්බර් 4 වන දින විදේශ කටයුතු, විදේශ රැකියා සහ සංචාරක අමාත්‍යාංශයේදී අග්‍රාමාත්‍ය ආචාර්ය හරිනි අමරසූරිය සහ විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතාගේ ප්‍රධානත්වයෙන් පැවැත්විණි.

මෙහිදී විදෙස් නියෝජිතයින් ඇමැතූ අග්‍රාමාත්‍ය ආචාර්ය හරිනි අමරසූරිය,

මෑත කාලයේ සිදු වූ ගංවතුර සහ නායයෑම් ව්‍යවසන තත්ත්වයන් හමුවේ විදේශ රටවලින් ලබා දුන් සහයෝගය පැසසුමට ලක් කළාය. ශ්‍රී ලංකාව මෑතකදී මුශුණ දුන් දරුණුතම ව්‍යසනය මෙය නමුත් ජනතාවගේ ශක්තිය සහ රජ්‍ය ආයතනවල මනා සම්බන්ධීකරණය සහ කැපවීම හේතුවෙන් සහන මෙහෙයුම් ක්‍රියාත්මක කිරීමේ දී සැලකිය යුතු ප්‍රගතියක් ලබා ගැනීමට හැකි වූ බවත්, පැවති ආපදා තත්ත්වය හමුවේ මෙරට සිටින සංචාරක ප්‍රජාවට කිසිදු අනතුරක් හෝ හානියක් සිදුවී නොමැති බව මෙහිදී අග්‍රාමාත්‍යවරිය තහවුරු කළාය.

මාර්ග අවහිරතා හේතුවෙන් ප්‍රවේශය සීමා වී තිබූ ප්‍රදේශවලට දැන් ළඟා විය හැකි බවත්, පොදු ස්ථාන සහ නිවාස යථා තත්ත්වයට පත් කරමින් ආරක්ෂිත බව සහතික කිරීම සඳහා දැවැන්ත මෙහෙයුම් දියත් වෙමින් පවතින බවත්, බලපෑමට ලක් වූ ප්‍රදේශවල සන්නිවේදනය කටයුතු සහ විදුලිය ලබා දීම යථා තත්ත්වයට පත් කරමින් පවතින බවත් අග්‍රාමාත්‍යවරිය තවදුරටත් අවධාරණය කළා ය.

ත්‍රිවිධ හමුදාව, පොලිසිය, රාජ්‍ය නිලධාරීන්, සෞඛ්‍ය සේවකයින්, ස්වේච්ඡා සේවකයින් සහ පළාත් පාලන ආයතනවල එකමුතුකම සහ කැපවීමේ ප්‍රතිඵලයක් ලෙස අවතැන් ජනතාවට සහන ලබා දීම , අවධානම් ප්‍රදේශවලින් ජනතාව ඉවත් කිරීමේ මෙහෙයුම් සහ අනතුරට පත් ජනතාව ගලවා ගැනීමේ මෙහෙවුම් මෙන්ම හදිසි ආධාර බෙදා හැරීම් කඩිනමින් සිදු වූ බව අග්‍රාමාත්‍ය ආචාර්ය හරිනි අමරසූරිය අවධාරණය කළාය.

යටිතල පහසුකම් ප්‍රතිසංස්කරණය, නැවත පදිංචි කිරීම සහ දිගුකාලීන වශයෙන් ආපදා අවම කිරීම ඇතුළු පවත්නා අභියෝගවලට මුහුණ දීම සඳහා මිත්‍ර රටවලින් තාක්ෂණික, මානුෂීය සහ මූල්‍යමය සහයෝගය අපේක්ෂා කරන බව අග්‍රාමාත්‍යවරිය පවසා සිටියා ය.

ආපදා කළමනාකරණ මධ්‍යස්ථානයේ අධ්‍යක්ෂ ජනරාල් මේජර් ජෙනරාල් සම්පත් කොටුවේගොඩ (විශ්‍රාමික) මහතා,

ව්‍යවසන තත්ත්වය හමුවේ දැනට බලපෑමට ලක් ව ඇති පවුල් සංඛ්‍යාව ගණනය කිරීම, ආපදා සහන මධ්‍යස්ථාන පවත්වා ගැනීම, හානි තක්සේරු කිරීම් සහ යළි ගොඩනැංවීමේ සැලසුම් සඳහා ජාත්‍යන්තර ආයතන සමඟ අඛණ්ඩව සම්බන්ධීකරණ කටයුතු කරන බවත්, පැවති සුළි කුණාටුව හේතුවෙන් දිස්ත්‍රික්ක 22 කට දැඩි ලෙස බලපෑම් එල්ල වී ඇති අතර ඇතැමි ස්ථානවලට මිලි මීටර් 540 ක පමණ වර්ෂාපතනයක් සහ සුළගේ වේගය පැයට කිලෝමීටර 70- 80 දක්වා වාර්තා වූ බවත් පැවසීය. එමඟින් විශාල ලෙස රටේ යටිතල පහසුකම්වලට හානි සිදුව ඇති බවත්, මුලික තක්සේරු කිරීම්වලට අනුව මිලියන 2.3 ක පිරිසක් ගංවතුරෙන් ආපදාවට ලක් වී ඇති බවත්, ඉන් මිලියන 1.8 ක ජනතාවක් සෘජුවම බලපෑමට ලක්ව ඇති බවත්, ඒ අතර ගැබිනි කාන්තාවන් 40,152 ක් සිටින අතර, ඔවුන්ට සහාය ලබා දීම සඳහා රජය ප්‍රමුඛතාවය ලඹ දී ඇති බවද පැවසුවේය.

ඉඩම් හෙක්ටයාර මිලියන 1.1 ක් බලපෑමට ලක්ව ඇති බවත්, අපදා තත්වයෙන් යළි ගොඩනැගීමට සහ අපදා හානි අවම කර ගැනීම වෙනුවෙන් පූර්ව අනතුරු ඇඟවීමේ පද්ධති, සිතියම්කරණ නවීන ක්‍රියාවලි සහ දේශගුණික ප්‍රතිචාර තාක්ෂණයන් වැනි තාක්ෂණික සහයෝගීතාවය තවදුරටත් විදෙස් සහය අවශ්‍ය වන ක්ෂේත්‍ර බව අවධාරණය කළේය.

ශ්‍රී ලංකා සංචාරක සංවර්ධන අධිකාරියේ සභාපති බුද්ධික හේවාවසම් මහතා,

අපදා තත්වය හමුවේ වවද ප්‍රධාන සංචාරක කලාප තවමත් සක්‍රියව ක්‍රියාත්මක වන බවත්, එම ස්ථානවල ආරක්ෂාව සහ තක්සේරු කිරීම් සිදුවෙමින් පවතින බවත්, ඉදිරි ආපදි තත්ත්වයන් හමුවේ විදේශකයින්හට සහාය වීමට සහ සංචාරක කර්මාන්තය ආරක්ෂා කිරීමට නිසි පියවර ගෙන ඇති බවත් පැහැදිලි කළේය.

මාරවිල සිට පාසිකුඩා දක්වා වෙරළබඩ ප්‍රදේශ සහ නිවාඩු නිකේතන නිසි පරිදි ක්‍රියාත්මක වන බවත්, එම ප්‍රදේශවල බොහෝ විදේශිකයින් දැනටමත් නවාතැන් ගෙන සිටින බව වාර්තා වී ඇති බවත් පැවසීය. නුවරඑළිය ප්‍රදේශයේ හෝටල් අර්ධ වශයෙන් ක්‍රියාත්මක බවත් පැවසූ ශ්‍රී ලංකා හෝටල් සංගමයේ සභාපති අශෝක හෙට්ටිගොඩ මහතා ශ්‍රී ලංකවේ සංචාරක ව්‍යාපාරය තවදුරටත් ශක්තිමත් කිරීමට සහයෝගය ලබා දෙන මෙන් රාජ්‍ය තාන්ත්‍රික ප්‍රජාවගෙන් ඉල්ලා සිටියේ ය.

පීඩාවට පත් ශ්‍රි ලාංකික ජනතාවට සිය ශෝකය පළ කළ රාජ්‍ය තාන්ත්‍රික නියෝජිතයින්, සහන කටයුතු සහ රට නැවත ගොඩනැගීම සඳහා ශ්‍රී ලංකාවට දිගුකාලීනව සහාය වීමට තම රජයන් සූදානමින් සිටින බව තහවුරු කළේය. අපදා තත්වය සමග උද්ගතව ඇති අර්බුද සහ අභියෝග කළමනාකරණය කිරීම සඳහා රජය විසින් ගෙන යනු ලබන විනිවිදභාවයකින් යුතු මැදිහත්වීම සහ සම්බන්ධීකරණය විදෙස් නියෝජිතයින් පැසසුමට ලක් කළේය.

අපදා තත්වය හමුවේ විදෙස් රටවලින් ලබා දෙන අඛණ්ඩ සහයෝගය පැසසුමට ලක් කළ අග්‍රාමාත්‍ය ආචාර්ය හරිනි අමරසූරිය, රට නැවත ගොඩ නැගීමට රජයේ කැපවී කටයුතු කරන, බව අවධාරණය කළා ය. ආපදා තත්වයන් සඳහා පෙර සූදානම, දේශගුණික විපර්යාසයන්ට ඔරොත්තු දීමේ හැකියාව ශක්තිමත් කිරීම සහ ඒ වෙනුවෙන් රාජ්‍ය ආයතනික ශක්තිමත් කිරීම ශ්‍රී ලංකාවේ ජාතික සංවර්ධන න්‍යාය පත්‍රයේ ඉලක්කයක් බව ද අග්‍රාමාත්‍යවරිය තවදුරටත් අවධාරණය කළාය.

විදේශ කටයුතු, විදේශ රැකියා සහ සංචාරක නියෝජ්‍ය අමාත්‍ය අරුන් හේමචන්ද්‍ර, අග්‍රාමාත්‍ය ලේකම් ප්‍රදීප් සපුතන්ත්‍රි, විදේශ කටයුතු අමාත්‍යාංශයේ ලේකම් අරුණි රණරාජා යන මහත්ම මහතමීන් ඇතුළු ආපදා කළමනාකරණ මධ්‍යස්ථානයේ (DMC) සහ ශ්‍රී ලංකා සංචාරක සංවර්ධන අධිකාරියේ (SLTDA) නියෝජිතයින් ඇතුළු රජයේ ජ්‍යෙෂ්ඨ නිලධාරීන් මෙම අවස්ථාවට සහභාගී විය.

අග්‍රාමාත්‍ය මාධ්‍ය අංශය

ශ්‍රේෂ්ඨාධිකරණ තීන්දුව අනුව ,රාජ්‍ය සේවා කොමිෂන් සභාව ලබා දී තිබෙන නිර්දේශ අනුව හා ගුරුසේවා ව්‍යවස්ථාව අනුව තරඟ විභාගයකින් ගුරු සේවයට බඳවා ගැනීම සඳහා සියලු පාර්ශවයන් එකඟ වී තිබෙන බව හා බඳවා ගැනීමේ දෙවැනි අදියරේදී පැවැත්වෙන සම්මුඛ පරීක්ෂණයේදී පාසැල්වල සේවයකරන සංවර්ධන නිලධාරීන්ට වාසි සහගත විශේෂ අවස්ථාවක් උදාවෙන බව අග්‍රාමාත්‍යතුමිය අද(05) පාර්ලිමේන්තුවේ දී පැවසුවාය.

තවදුරටත් කරුණු පැහැදිලි කරමින් අගමැතිතුමිය මෙසේ ප්‍රකාශ කළාය .

අධිකරණ නීති කෘත්‍යයේ අවසාන නියෝගයට යටත්ව හා ශ්‍රී ලංකා ගුරු සේවා ව්‍යවස්ථාවේ ප්‍රතිපාදනයන්ට අනුව සංවර්ධන නිලධාරීන්ට ශ්‍රී ලංකා ගුරු සේවයට එක්වීමට අවස්ථාව සලසා දීමට හැකිය.

තරග විභාගය සඳහා අයඳුම්පත් කැඳවීමේ නිවේදනයේ සඳහන් අයදුම්කරුවන්ගේ උපරිම වයස අවුරුදු 40 සීමාව මේ අවස්ථාවට පමණක් වයස අවුරුදු 45 දක්වා වෙනස් කිරීමට නියම කර ඇත.

ශ්‍රේෂ්ඨාධිකරණය විසින් දී ඇති නඩු තීන්දු ප්‍රකාරව රාජ්‍ය සේවයේ නියුතු උපාධිධාරීන් හා රාජ්‍ය සේවයේ නියුතු නොවන උපාධිධාරීන් බඳවා ගැනීම් සඳහා වයස් සීමාව සංශෝධනය කරමින් වෙන වෙනම විභාග පවත්වා ගුරු සේවයේ පවතින පුරප්පාඩු සඳහා ගුරු සේවයේ 3.1.ආ ශ්‍රේණියට ගුරුවරු බඳවා ගැනීමට කටයුතු කරමින් පවතින බවද අගමැතිතුමිය පැවසුවාය.

අග්‍රාමාත්‍ය මාධ්‍ය අංශය

දැඩි ගංවතුර සහ නායයෑම් හේතුවෙන් මෑතකදී ඇති වූ විනාශය නොතකා, ජනතාව විසින් පෙන්නුම් කරන ලද ශක්තිය සහ සහයෝගීතාවය හේතුවෙන් ශ්‍රී ලංකාව වේගයෙන් යථා තත්ත්වයට පත්වෙමින් පවතින බව අග්‍රාමාත්‍ය ආචාර්ය හරිනි අමරසූරිය පැවසුවාය. “අපට දැඩි අභියෝගයක් එල්ල වී තිබෙනවා, නමුත් අපි ඇද වැටී නැහැ. අපේ ජනතාව ශක්තිමත්, ඒ තුළින් අපි මුහුණ දුන් සෑම අර්බුදයකින්ම ජය ගැනීමට හැකි වී තිබෙනවා,” දෙසැම්බර් 4 වන දින කොළඹ ICT රත්නදීප හෝටලයේ පැවති NASSCOM විධායක කමිටු සහ SLASSCOM සංගම් හමුව අමතමින් අග්‍රාමාත්‍යවරිය පැවසුවාය.

ඩිජිටල්-ආර්ථික සහයෝගීතාව, ආයෝජන අවස්ථා සහ ශ්‍රී ලංකාවේ තොරතුරු සහ සන්නිවේදන තාක්ෂණයේ ඉදිරි මාවත සාකච්ඡා කිරීම සඳහා සමාගම් 3,000 කට අධික සංඛ්‍යාවක් නියෝජනය කරන ඉන්දියාවේ තාක්ෂණික කර්මාන්තයේ ඉහළ පෙළ ආයතනයක් වන NASSCOM සහ සාමාජික සමාගම් 350 කට අධික සංඛ්‍යාවක් සමඟ IT සහ BPM අංශය සඳහා වන ශ්‍රී ලංකා ජාතික මණ්ඩලයක් වන SLASSCOM සංගමය මේ අවස්ථාවට එක් විය.

රටේ මෑත කාලීන අභියෝග මධ්‍යයේ වුවද, ශ්‍රී ලංකාවේ සිය වාර්ෂික සංචාරයට එක් වූ NASSCOM නියෝජිත පිරිස අග්‍රාමාත්‍යවරිය විසින් පැසසුමට ලක් කරන ලද අතර, ඔවුන්ගේ පැමිණීම ශ්‍රී ලංකාවේ ස්ථාවරත්වය සහ නැවත ගොඩ නැගීම සඳහා පන්නරයක් ලබා දුන් බව පැවසුවා ය. නැවත පදිංචි කිරීම, ආපදාවලට මුහුණ දීම සඳහා පෙර සූදානම ශක්තිමත් කිරීම, ගංවතුර පාලනය සහ ප්‍රධාන යටිතල පහසුකම් ප්‍රතිසංස්කරණය ඇතුළත් ප්‍රතිසංස්කරණ කටයුතු මෙහෙයවීම සඳහා රජය, ලෝක බැංකුව සහ එක්සත් ජාතීන්ගේ සංවිධානය සමඟ එක්ව කෙටි කාලීන සහ දිගුකාලීන තක්සේරු ක්‍රියාමාර්ග ගෙන යන බව ද අග්‍රාමාත්‍යවරිය මෙහිදී පැහැදිලි කළාය.

සාකච්ඡාව අතරතුර අදහස් දැක්වූ අග්‍රාමාත්‍ය ආචාර්ය හරිනි අමරසූරිය, ශ්‍රී ලංකාවේ ආර්ථික සැලැස්ම ස්ථිරව පවතින බව අවධාරණය කළාය. රජය මධ්‍යම සහ දිගු කාලීන ඉලක්කයක් ලෙස 7% ක ආර්ථික වර්ධනයක් ඉලක්ක කර ඇති බවට සඳහන් කළ අග්‍රාමාත්‍යවරිය, අපනයන විවිධාංගීකරණය සහ ඩිජිටල් ආර්ථිකය වේගවත් කිරීම යන ප්‍රධාන ක්ෂේත්‍ර සඳහා පැමිණි තාක්ෂණික නියෝජිත පිරිසගේ සහයෝග අපේක්ෂා කරන බව ද අවධාරණය කළා ය. “ශක්තිමත් ඩිජිටල් ආර්ථිකයක් ගොඩ නැගීමට අපි කැපවී සිටිනවා. මේ ක්ෂේත්‍ර සඳහා අපි ඉන්දියාවේ අඛණ්ඩ සහයෝගීතාවය සහ හවුල්කාරිත්වය බලාපොරොත්තු වෙනවා” අග්‍රාමාත්‍යවරිය පැවසුවාය.

රජයේ ආයතන තුළ ඩිජිටල් පරිවර්තනයේ ප්‍රගතිය පිළිබඳ ඇසූ ප්‍රශ්නවලට පිළිතුරු දුන් අග්‍රාමාත්‍යවරිය, අධ්‍යාපන අමාත්‍යාංශය විසින් ජනවාරි මාසයේදී දියත් කිරීමට නියමිත ජාතික අධ්‍යාපන කළමනාකරණ පද්ධතිය සම්බන්ධයෙන් දැනටමත් කටයුතු ආරම්භ කර ඇති බවත් එය ජනවාරි මාසයේදී දියත් කරන බවත් පැවසුවා ය. අනෙකුත් අමාත්‍යාංශ විසින් අදාළ ඩිජිටල්කරණ කටයුතු ආරම්භ කර ඇති බවත් ඉදිරි මාසවලදී ඔවුන්ගේ පද්ධති හඳුන්වා දීමට සූදානම් බවත් අග්‍රාමාත්‍යවරිය තවදුරටත් සඳහන් කළාය.

ආපදා තත්ත්වයන් පිළිබඳ සොයා බැලීම, සිතියම්ගත කිරීම සහ භූගෝලීය දත්ත ලබා ගැනීම සඳහා ඩ්‍රෝන යානා තාක්ෂණය ලබා දීමට ඉන්දියානු තාක්ෂණික සමාගම විසින් සිදු කරන ලද යෝජනාව අග්‍රාමාත්‍යවරිය විසින් පිළිගත් අතර ලේඛනගත කිරීම සහ කාලීන අධීක්ෂණය ඇතුළුව ශ්‍රී ලංකාවේ ආපදා කළමනාකරණ හැකියාවන් වැඩිදියුණු කිරීම සඳහා තාක්ෂණික සහාය ලබා දීමට නියෝජිතයින් ඉදිරිපත් විය. පවතින තාක්ෂණයේ ඇති දුර්වලතා හේතුවෙන් මෙම වසරේ වර්ෂාපතනය පිළිබඳ නිසි පුරෝකථනයක් සිදු කිරීම සීමා වී ඇති බවත්, එම නිසා අනාගත ආපදා තත්ත්වයන් හොඳින් කළමනාකරණය කිරීම සඳහා ශ්‍රී ලංකාවේ පූර්ව අනතුරු ඇඟවීමේ පද්ධති ශක්තිමත් කිරීම සහ තාක්ෂණයන්හි ආයෝජන් සිදු කළ යුතු බවත් අග්‍රාමාත්‍යවරිය පිළිගත්තා ය.

රජයේ ප්‍රතිසංස්කරණ න්‍යාය පත්‍රය පැහැදිලි කළ අග්‍රාමාත්‍යවරිය, IT සහ BPM ආයෝජන සඳහා ශ්‍රී ලංකාව ප්‍රමුඛ පෙළ ගමනාන්තයක් බවට පත් කිරීමට අදාළ නියාමන රාමු, ප්‍රතිසංස්කරණ සහ ඩිජිටල් පරිවර්තන මුලපිරීම් ක්‍රියාත්මක වෙමින් පවතින බව පැහැදිලි කළා ය. මානව සම්පත සංවර්ධනය කිරීම, අධ්‍යාපන ප්‍රතිසංස්කරණ සහ කුසලතා මුල් කරගත් රැකියා අවස්ථා පුළුල් කිරීමේ ජාතික සැලැස්ම හරහා 2030 වන විට IT සහ BPM අංශයේ අපනයන වටිනාකම ඇමරිකානු ඩොලර් බිලියන 5 ක් බවට පත් ගැනීමට ශ්‍රී ලංකාව අරමුණු කරන බව ද අග්‍රාමාත්‍යවරිය තවදුරටත් අවධාරණය කළා ය. රාජ්‍ය අංශය ඩිජිටල්කරණය කිරීම, ඩිජිටල් හැඳුනුම්පත් පද්ධතියක් ක්‍රියාත්මක කිරීම සහ ජාතික අධ්‍යාපන කළමනාකරණ පද්ධතිය වැනි ඒකාබද්ධ වැඩසටහන් හඳුන්වාදීම සම්බන්ධයෙන් රජය ඉන්දියාව සමඟ සමීපව කටයුතු කිරීමට සූදානම් බවද අග්‍රාමාත්‍යවරිය තවදුරටත් අවධාරණය කළාය.

මෙම නිල සංචාරය, ශ්‍රී ලංකාවේ තොරතුරු හා සන්නිවේදන තාක්ෂණික අංශය ශක්තිමත් කිරීම සහ ප්‍රමුඛ පෙළේ ඉන්දියානු සහ ගෝලීය තාක්ෂණ කර්මාන්ත සඳහා උපායමාර්ගික ව්‍යාප්ති වෙළඳපොළක් ලෙස ශ්‍රී ලංකාව ස්ථානගත කිරීම අරමුණු කරගත් NASSCOM සහ SLASSCOM අතර දිගුකාලීන සහයෝගීතාවයක ප්‍රයත්නයක් වන අතර 2026 වසරේ දී NASSCOM තාක්ෂණික සහ නායකත්ව සංසදය SLASSCOM හි පැවැත්වීමට සමගාමීව සිදු විය.

මෙම අවස්ථාවට ඩිජිටල් ආර්ථිකය පිළිබඳ නියෝජ්‍ය අමාත්‍ය එරංග වීරරත්න, ඩිජිටල් ආර්ථිකය පිළිබඳ ජනාධිපති ප්‍රධාන උපදේශක ආචාර්ය හාන්ස් විජේසූරිය, ඉන්දීය මහ කොමසාරිස් අතිගරු සන්තෝෂ් ජා සහ SLASSCOM සහ NASSCOM හි නියෝජිතයින් සහභාගී වූහ.

අග්‍රාමාත්‍ය මාධ්‍ය අංශය

රටේ පැවැති අයහපත් කාලගුණ තත්ත්වයෙන් පීඩාවට පත් සිසු දරුවන්ට උපකාර කිරීම සඳහා මේ වන විට රටේ බොහෝ පිරිස් සහ සංවිධාන පැසසිය යුතු දායකත්වයක් ලබා දෙමින් පවතියි. එලෙස දායකත්වය ලබා දෙන දෙස්-විදෙස් පරිත්‍යාගශීලීන්ගේ මූල්‍යමය ආධාර භාර ගැනීමට රජය විසින් ගිණුම් අංක කිහිපයක් ද හඳුන්වා දී ඇත.

අධ්‍යාපන, උසස් අධ්‍යාපන හා වෘත්තිය අධ්‍යාපන අමාත්‍යාංශය ඇතුළු රජයේ අමාත්‍යාංශ සෘජුව වගකීම දරන්නේ රජය විසින් හඳුන්වා දුන් එම ගිණුම් සඳහා යොමු කරන මූල්‍යමය පරිත්‍යාග සඳහා පමණි. මූල්‍යමය ආධාර භාර ගන්නා වෙනත් සංගමයක හෝ පුද්ගලයකුගේ ගිණුම් අංක සඳහා මෙම අමාත්‍යාංශය එකඟතාවක් හෝ අනුමැතියක් ලබා දී නොමැති අතර එම මූල්‍යමය පරිත්‍යාගවල වගකීම අදාළ සංගම් හෝ පුද්ගලයන් විසින් දරනු ඇත. මෙම අසීරු අවස්ථාවේ ජනතාව විසින් සිදු කරන දායකත්වය අගය කරන අතර සිසුන් වෙනුවෙන් සිදු කරන මූල්‍යමය පරිත්‍යාගවලදී එහි වගකීම් සහගත බව පිළිබඳ සැලකිලිමත් වන ලෙස ඉල්ලා සිටිනු ලැබේ.

රජයේ ගිණුම් තොරතුරු සඳහා පිවිසෙන්න : www.donate.gov.lk

ගිණුම් අංක:

1. US Dollar (USD)
Bank: Deutsche Bank Trust Company Americas, New York, USA
Recipient Account Name: Central Bank of Sri Lanka
Account Number: 04015541
Routing Number: 021001033
SWIFT: BKTRUS33XXX

2. Euro (EUR)
Bank: ODDO BHF Bank, Frankfurt am Main, Germany
Recipient Account Name: Central Bank of Sri Lanka
Account Number: 0000739854
IBAN: DE39500202000000739854
SWIFT: BHFBDEFF500

3. Pound Sterling (GBP) – Account 1
Bank: HSBC Bank Plc, London, UK
Recipient Account Name: Central Bank of Sri Lanka
Account Number: 39600144
Sort Code: 40-05-15
IBAN: GB48MIDL40051539600144
SWIFT: MIDLGB22XXX

4. Pound Sterling (GBP) – Account 2
Bank: Bank of Ceylon (UK) Ltd, London, UK
Recipient Account Name: Central Bank of Sri Lanka
Account Number: 88001249
Sort Code: 40-50-56
IBAN: GB89BCEY40505688001249
SWIFT: BCEYGB2LXXX

5. Japanese Yen (JPY)
Bank: MUFG Bank, Tokyo, Japan
Recipient Account Name: Central Bank of Sri Lanka
Account Number: 653-0407895
SWIFT: BOTKJPJTXXX

6. Australian Dollar (AUD)
Bank: Reserve Bank of Australia
Recipient Account Name: Central Bank of Sri Lanka
Account Number: 81736-4
BSB: 092002
SWIFT: RSBKAU2SXXX

7. Sri Lankan Rupees (LKR)
Account Name: Deputy Secretary to the Treasury
Account Number: 2026450
Bank: Bank of Ceylon
Branch Name : Thaprobane branch
Swift: BCEYLKLX

8. Sri Lankan Rupees (LKR)
Account Name: Deputy Secretary to the Treasury
Account Number: 014100130110432
Bank: People’s Bank
Branch: Union Place Branch
SWIFT: PSBKLKLX

අග්‍රාමාත්‍ය මාධ්‍ය අංශය

බස්නාහිර පළාත් කසළ කළමනාකරණ කමිටු රැස්වීම අග්‍රාමාත්‍ය කාර්යාලයේදී අද (04) දින අග්‍රාමාත්‍යතුමියගේ ප්‍රධානත්වයෙන් පැවැත්විණි. එහිදී ආපදා තත්ත්වය හේතුවෙන් ගොඩනැගුණු කසළ ක්‍රමවත්ව ඉවත් කර පිරිසිදු කිරීම් සති තුනකින් අවසන් කළ යුතු බව අග්‍රාමාත්‍යතුමිය පැවසුවාය.

මෙම වැඩපිළිවෙළේදී ගොඩගැසෙන කසළ ඉක්මනින් ඉවත් කර ගැනීමට ඉඩම් සංවර්ධනය කිරීමේ සංස්ථාව සතු කෙරවලපිටිය පිහිටි භූමියෙන් අක්කර පහක ඉඩම ලබා දී ඇති බැවින්, ඒ අනුව දැනට ගොඩගැසෙන කසළ ගැටලුවකින් තොරව ඉවත් කර ගැනීමට හැකි බව කමිටුව තීරණය කරන ලදී. එම ඉඩමේ ගබඩා වන කසළ ක්‍රමවත්ව ඉවත් කිරීමටද එහිදී අදාළ ආයතන එකඟ විය.

මේ අවස්ථාවට නාගරික සංවර්ධන අමාත්‍ය එරංග ගුණසේකර, බස්නාහිර පළාත් ආණ්ඩුකාර හනීෆ් යූසුෆ්, පාර්ලිමේන්තු මන්ත්‍රී, කොළඹ දිස්ත්‍රික් සංවර්ධන කමිටු සභාපති ලක්ෂ්මන් නිපුණ ආරච්චි, කොළඹ නගරාධිපතිනි ව්‍රායි කැලී බල්තසාර්, අග්‍රාමාත්‍ය ලේකම් ප්‍රදීප් සපුතන්ත්‍රී, කොළඹ දිස්ත්‍රික් ලේකම් ගිනිගේ ප්‍රසන්න ජනක කුමාර, අතිරේක දිස්ත්‍රික් ලේකම් කෞශල්‍යා කුමාරි, අග්‍රාමාත්‍ය අතිරේක ලේකම් සාගරිකා බෝගහවත්ත යන මහත්ම මහත්මීන්ද, ඉඩම් සංවර්ධනය කිරීමේ සංස්ථාවේ සභාපති ඇතුළු නිලධාරීන්ද, මධ්‍යම පරිසර අධිකාරියේ අධ්‍යක්ෂ ජනරාල් ඇතුළු නිලධාරීන්ද, විදුලිබල මණ්ඩලයේ අතිරේක සාමාන්‍යාධිකාරී ඇතුළු නිලධාරීන්ද සහභාගි වූහ.

අග්‍රාමාත්‍ය මාධ්‍ය අංශය