විහාරස්ථාන ඇතුළු සියලු ආගමික ස්ථාන ආගමික කටයුතු පමණක් නොව, සාරධර්ම වර්ධනය කරන, සමාජයට නිවැරදි මඟ පෙන්වන, ජාතික සමගිය ඇතිකරන ස්ථාන බවට පත්කිරීමට අවශ්‍යකරන ඕනෑම සහයෝගයක් ලබාදීම සදහා රජය සූදානම් බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.

වාද්දුව පොහොද්දරමුල්ල ශ්‍රී ලංකා රාමඤ්ඤ මහා නිකායික මහිගර්ජනාරාම විහාරස්ථානයේ අභිනවයෙන් ඉදිකරන ලද චෛත්‍ය රාජයාණන් වහන්සේගේ කොත නිරාවරණය සහ නව සංඝාවාසය විවෘත කිරීමේ මහෝත්සවට සහභාගී වෙමින් අද (26) අග්‍රාමාත්‍ය ආචාර්ය හරිනි අමරසූරිය මේ බව ප්‍රකාශකර සිටියාය.

කොත නිරාවරණයට පෙර වැඩමවා සිටි ඇඹිලිපිටිය ශ්‍රී බෝධිරාජ ධර්මායතනාධිපති දක්ෂිණ ලංකාවේ ප්‍රධාන සංඝනායක සිංගප්පූරුව මැලේසියාව බෝධිරාජ මධ්‍යස්ථානයන්හි අධිපති ආචාර්ය පූජ්‍ය ඕමල්පේ සෝභිත ස්වාමීන් වහන්සේ ඇතුළු නායක හිමිපානන් වහන්සේලා බැහැ දුටු අග්‍රාමාත්‍යතුමිය, පාරිසරික පාරිශුද්ධත්වය සහ දරුවන්ගේ සදාචාරාත්මකභාවය වර්ධනය ඇතුළු පාසල් තුළ සිදුකරන ඩෙංගු මර්දන වැඩසටහන් පිළිබඳව නායක ස්වාමීන් වහන්සේලා සමඟ අදහස් හුවමාරු කරගත්තාය.

අනතුරුව එම විහාරස්ථානයේ අභිනවයෙන් ඉදිකරන ලද චෛත්‍ය රාජයාණන් වහන්සේගේ කොත නිරාවරණය කිරීමේ කාර්යයට සහභාගී වූ අග්‍රාමාත්‍යවරිය, චෛත්‍යරාජයානන් වෙත ප්‍රථම පුෂ්පෝපහාරය ද සිදු කළාය.

අනතුරුව අදහස් දැක්වූ අග්‍රාමාත්‍ය ආචාර්ය හරිනි අමරසූරිය මෙසේද පවසා සිටියාය

මෙම විහාරස්ථානයේ චෛත්‍ය රාජයාණන් වහන්සේගේ කොත පළඳවන්නටත්, අලුත් සංඝාවාසය මහා සංඝරත්නය වෙත පූජා කරන්නටත් සංවිධානය කර තිබෙන මේ උතුම් පින්කමට එකතු වෙන්න ලැබීම මම ලැබූ ලොකු භාග්‍යයක් ලෙස සලකනවා. මෙය විහාරස්ථානයේ ඉදිරි ගමනට අලුත් පියවරක් තැබීමක්.

අතීතයේ වටිනාකම් ආරක්ෂා කරගෙන, අනාගත පරපුරට ශක්තිමත් උරුමයක් බාරදෙන වැදගත් අවස්ථාවක්.

ආගමික ස්ථාන දියුණු කරනවා කියන්නේ ගඩොලින් වැලිවලින් ගොඩනැගිලි හදන එක විතරක් නෙවෙයි. ඒක මිනිසුන්ගේ හදවත් එකට යා කරන, හොඳ සාරධර්ම ආයෙමත් පණගන්වන පරිසරයක් නිර්මාණය කිරීමක්. ඒ වගකීම අප හැමෝගෙම වගකීමක්.

සමාජය සහ පන්සල අතර විශාල බැඳීමක් තිබෙනවා. ඒක සමාජ පැවැත්ම හා සදාචාරය සමඟ එකට බැඳුණු දෙයක්.

අද තාක්ෂණයේ දියුණුවත්, මිනිසුන්ගේ කාර්යබහුල ජීවිතයත් සමඟ ඒ බැඳීම අඩුවෙලා කියලා දැන් අපට දැනෙන්න පුළුවන්. නමුත් අපට දුකක් දැනුනු විට, ප්‍රශ්නයක් ආවම අපට මුලින්ම මතක් වෙන්නේ අපේ ආගම. ඒක අපේ ආධ්‍යාත්මය තුළ තිබෙන දෙයක්.රටක් දියුණු වෙන්නේ ආර්ථිකයෙන් විතරක් නෙවෙයි.

මිනිසුන්ගේ සිතිවිලි යහපත් වෙලා, සදාචාරය ශක්තිමත් වුණු දවසටයි රටක සැබෑ පුනරුදයක් ඇතිවෙන්නේ. ඒ ගමනට අපේ ගරුතර මහා සංඝරත්නයත්, මේ වගේ විහාරස්ථානත් ලබාදෙන පූර්ණ දායකත්වය මම මේ වෙලාවේ ගෞරවයෙන් අගය කරනවා.

එමෙන්ම, මෙරට පැවති පැරණි බෞද්ධ දැනුම් පද්ධතිය හා බැඳුණු සංස්කෘතිය සම්බන්ධව සොයාබැලීම සඳහා අනුරාධපුර, තිස්සමහාරාමය සහ යාපහුව වැනි ප්‍රදේශවල කැනීම් කටයුතු මේ වන විට ආරම්භ කර ඇති බවද ඇය පවසා සිටියාය

මෙම අවස්ථාව සඳහා මල්වතු මහා විහාර පාර්ශ්වයේ බස්නාහිර පළාතේ ප්‍රධාන සංඝනායක කොරොස්දූව වජ්‍රකෝත් මහා විහාරාධිපති සමස්ත ලංකා ශාසනාරක්ෂක බල මණ්ඩලයේ හිටපු ලේඛකාධිකාරී ශාස්ත්‍රපති පූජ්‍ය ගෝනදූවේ ගුණානන්ද ස්වාමීන් වහන්සේ, යටවර ධර්ම වර්ධනාරාමාධිපති මිල්ලනිය ශාසනාරක්ෂක බල මණ්ඩලයේ සභාපති පයාගල ප්‍රාදේශීය සංඝ සභාවේ උපාධ්‍යාය පරිත්ත භාණක පූජ්‍ය යටවර ඤාණසිරි ස්වාමීන් වහන්සේ, නෑහින්න ශ්‍රී විශුද්ධාරාමාධිපති විනය විශාරද පරිත්ත භාණක පූජ්‍ය බටදූවේ සිරිවිමල නායක ස්වාමීන් වහන්සේ සහ වාද්දුව පොහොද්දරමුල්ල ශ්‍රී ලංකා රාමඤ්ඤ නිකායික මහිගර්ජනාරාම විහාරස්ථානයේ නායක ස්වාමීන් වහන්සේ ඇතුළු පිරිවෙන් අධිපති ස්වාමීන් වහන්සේලා සහ මහා සංඝරත්නය, කළුතර දිස්ත්‍රික් පාර්ලිමේන්තු මන්ත්‍රී නිලන්ති කොට්ටහච්චි, පාර්ලිමේන්තු මන්ත්‍රී නන්දන පත්මකුමාර යන මහත්ම මහත්මීන් ඇතුළු පාර්ලිමේන්තු මන්ත්‍රීවරුන්, කළුතර ප්‍රාදේශීය සභාවේ සභාපති, ප්‍රාදේශීය සභා මන්ත්‍රීවරුන්, දායක දායිකාවන් විශාල පිරිසක් සහභාගී වූහ.

අග්‍රාමාත්‍ය මාධ්‍ය අංශය

ළමුන්ට එරෙහි හිංසනය පිළිබඳ එක්සත් ජාතීන්ගේ මහලේකම්වරයාගේ විශේෂ නියෝජිත ආචාර්ය Najat Maalla M’jid මහත්මිය ඇතුළු UNICEF නියෝජිත පිරිස 2026 ජූනි 25 දින පාර්ලිමේන්තු පරිශ්‍රයේදී අග්‍රාමාත්‍ය ආචාර්ය හරිනි අමරසූරිය හමුවිය.

ශ්‍රී ලංකා රජය සමඟ සහයෝගීතාව තවදුරටත් ශක්තිමත් කරමින් දරුවන්ගේ ආරක්ෂාව සහ යහපැවැත්ම තහවුරු කිරීම, මෙන්ම දරුවන්ට එරෙහි සියලු ආකාරයේ හිංසනයන් වැළැක්වීම සහ ඒවාට ප්‍රතිචාර දැක්වීම සඳහා ගනු ලබන ක්‍රියාමාර්ග පිළිබඳව මෙම හමුවේදී අවධානය යොමු කෙරිණි.

මෙහිදී අග්‍රාමාත්‍යතුමිය UNICEF සංවිධානය විසින් ඩිට්වා සුළි කුණාටු ආපදා තත්වය හමුවේ ලබාදුන් සහාය මෙන්ම අධ්‍යාපන හා පූර්ව ළමා අධ්‍යාපන ප්‍රතිසංස්කරණ සහ දරුවන්ට එරෙහිව සිදුවන හිංසනය වැළැක්වීම සහ ඒවාට ප්‍රතිචාර දැක්වීම අරමුණු කරගත් වැඩසටහන් සඳහා ලබාදෙන සහයෝගය පැසසුමට ලක් කළාය.

ශ්‍රී ලංකාව ප්‍රතිපත්ති සකස් කිරීම සම්බන්ධයෙන් සැලකිය යුතු ප්‍රගතියක් ලබා තිබුණද, එම ප්‍රතිපත්ති ඵලදායී ලෙස ක්‍රියාත්මක කිරීම ප්‍රධාන අභියෝගයක් බව අග්‍රාමාත්‍යතුමිය මෙහිදී සඳහන් කළාය.

ළමා ආරක්ෂණ සම්බන්ධයෙන් මෙම ක්ෂේත්‍රයේ ආයතනික ධාරිතාව සහ මානව සම්පත් සම්බන්ධ පවතින ගැටලු සඳහා විසඳුම් ලබා දීමේ අවශ්‍යතාව අවධාරණය කළ අග්‍රාමාත්‍යතුමිය, ළමා ආරක්ෂණය සම්බන්ධ වගකීම් දරන ආයතන අතර සම්බන්ධීකරණය ශක්තිමත් කිරීමේ වැදගත්කම පෙන්වා දුන්නාය.

ළමා ආරක්ෂණ සේවා සැපයීමේදී අත්‍යවශ්‍ය ක්ෂේත්‍ර හරහා ඉටු කරන කාර්යභාරය පිළිබඳව ද අග්‍රාමාත්‍යතුමිය විශේෂයෙන් අවධාරණය කළාය.

ළමා ආරක්ෂණ පද්ධතිවල පවතින ගැටලු සඳහා විසඳුම් සෙවීම සඳහා අදාළ සියලු පාර්ශ්ව එක්ව කටයුතු කිරීමේ වැදගත්කම පිළිබඳව UNICEF නියෝජිත පිරිස අග්‍රාමාත්‍යතුමියගේ අවධානය යොමු කළ අතර විශේෂයෙන්ම, දරුවන්ට සිදුවන හිංසන සහ අපයෝජන වාර්තා කිරීමටත් අවශ්‍ය සහාය ලබාගැනීමටත් පැහැදිලි හා පහසුවෙන් ප්‍රවේශ විය හැකි යාන්ත්‍රණයක් ලබා දීමේ අවශ්‍යතාව පිළිබඳව අවධානය යොමු කෙරිණි.

ළමා ආරක්ෂණය තහවුරු කිරීමේදී උපදේශන සේවා, අවදානම් තත්ත්වයන් කල්තියා හඳුනාගැනීම, අපයෝජන හෝ හිංසනයට ලක් වූ බවට ලක්ෂණ හඳුනාගැනීම, සවන් දීම සහ පෞද්ගලිකත්වය ආරක්ෂා කිරීමේ වැදගත්කම Dr. Najat Maalla M’jid මහත්මිය මෙහිදී පෙන්වා දුන් අතර දරුවන්ට එරෙහිව අන්තර්ජාලය හරහා සිදුවන හිංසනය සහ අපයෝජන වැළැක්වීමේ අවශ්‍යතාව මෙන්ම ඩිජිටල් පරිසරයන් තුළ දරුවන්ගේ ආරක්ෂාව තහවුරු කිරීම සඳහා ගත යුතු ක්‍රියාමාර්ග පිළිබඳව ද මෙම හමුවේදී සාකච්ඡා කෙරිණි.

මෙම අවස්ථාවට ළමුන්ට එරෙහි හිංසනය පිළිබඳ එක්සත් ජාතීන්ගේ මහලේකම්වරයාගේ විශේෂ නියෝජිත ආචාර්ය Najat Maalla M’jid, UNICEF ශ්‍රී ලංකා නියෝජිත Emma Brigham , ශ්‍රී ලංකාවේ එක්සත් ජාතීන්ගේ නේවාසික සම්බන්ධීකාරක Marc-André Franche යන මහත්ම මහතමීන්, විදේශ කටයුතු අමාත්‍යාංශයේ නිලධාරීන් සහ අධ්‍යාපන අමාත්‍යාංශයේ අතිරේක ලේකම්වරුන් හා නිලධාරීන් සහභාගී වූහ.

අග්‍රාමාත්‍ය මාධ්‍ය අංශය

ලංකා වාණිජ මණ්ඩලයේ (The Ceylon Chamber of Commerce) නියෝජිත පිරිසක් සහ  අග්‍රාමාත්‍ය ආචාර්ය හරිනි අමරසූරිය අතර හමුවක් අද (ජුනි 24) පාර්ලිමේන්තු පරිශ්‍රයේදී පැවැත්විණි. 

​2026 ඔක්තෝබර් මස 12 සහ 13 දෙදින  පැවැත්වීමට නියමිත “ශ්‍රී ලංකා ආර්ථික සහ ආයෝජන සමුළුව (SLEIS 2026)” සම්බන්ධයෙන් මෙහිදී සාකච්ඡා කළ අතර ඩිජිටල්කරණය සහ නව අධ්‍යාපන ප්‍රතිසංස්කරණ යටතේ පාසල් සඳහා ඩිජිටල් තාක්ෂණය හදුන්වා දීම සහ මෙරට අධ්‍යාපන ක්ෂේත්‍රය සහ කෘත්‍රිම බුද්ධිය (AI) මගින් සිදුවන පරිවර්තනීය කාර්යභාරය පිලිබඳව ද මෙහිදී අවධානය යොමු විය. 

දේශීය හා විදේශීය ආයෝජන දිරිගැන්වීම මෙන්ම රටේ ඉදිරි ආර්ථික ප්‍රතිපත්ති හැඩගැස්වීම සඳහා මෙම සමුළුව ඉතා වැදගත් වනු ඇතැයි ලංකා වාණිජ මණ්ඩලයේ නියෝජිතයින් මෙහිදී ⁣පැවසීය. 

මෙම අවස්ථාවට ලංකා වාණිජ මණ්ඩලයේ සභාපති ක්‍රිෂාන් බාලේන්ද්‍ර, නියෝජ්‍ය උප සභාපති විනෝද් හිරදරාමානි, මහලේකම් සහ ප්‍රධාන විධායක නිලධාරී ශිරාන් ප්‍රනාන්දු, නියෝජ්‍ය මහලේකම් / ප්‍රධාන මෙහෙයුම් නිලධාරී ඇලිකි පෙරේරා  සහ ආර්ථික බුද්ධි අංශයේ ප්‍රධාන ආර්ථික විද්‍යාඥ අනගි රොද්‍රිගූ-වීරසේකර යන මහත්ම මහතමීන් ඇතුළුපිරිසක්  සහභාගී වූහ. 

අග්‍රාමාත්‍ය මාධ්‍ය අංශය

සෑම දරුවෙකුටම ආරක්ෂිත වටපිටාවක අධ්‍යාපනය ලබමින්, තම හැකියාවන් වර්ධනය කර ගැනීමට හැකි පරිසරයක් නිර්මාණය කිරීම අපගේ වගකීමක්

දකුණු ආසියානු කලාපයේ ළමුන්ට එරෙහි හිංසනය අවසන් කිරීම පිළිබඳ අමාත්‍ය සමුළුවේ (South Asia Ministerial Conference on Ending Violence against Children (EVAC) සමාරම්භක අවස්ථාවට එක්වෙමින් ජුනි 23 දින කොළඹදී අග්‍රාමාත්‍ය ආචාර්ය හරිනි අමරසූරිය මෙම අදහස් පළ කළා ය.

ජුනි 23 සහ 24 දෙදින පුරා පැවැත්වෙන මෙම කලාපීය සමුළුව හරහා දකුණු ආසියාව තුළ ළමුන්ට එරෙහිව සිදුවන හිංසනය තුරන් කිරීම සඳහා දේශපාලනික පසුබිම ශක්තිමත් කිරීම, මෙතෙක් ලබාගෙන ඇති ප්‍රගතිය සහ ඉදිරි ක්‍රියාමාර්ග පිළිබඳ විශේෂ අවධානයක් යොමු කෙරේ.

දකුණු ආසියානු කලාපීය සහයෝගිතා සංවිධානය (SAARC) විසින්, දකුණු ආසියාව සඳහා වන යුනිසෙෆ් කලාපීය කාර්යාලය (UNICEF ROSA), ලෝක සෞඛ්‍ය සංවිධානයේ අග්නිදිග ආසියානු සහ නැගෙනහිර මධ්‍යධරණී කලාපීය කාර්යාලය (WHO SEARO/EMRO), සහ ළමුන්ට එරෙහි ප්‍රචණ්ඩත්වය පිළිබඳ එක්සත් ජාතීන්ගේ මහලේකම් විශේෂ නියෝජිත කාර්යාලය (OSRSG-VAC) සමඟ එක්ව සංවිධානය කරන මෙම සමුළුව කලාපයේ අමාත්‍යවරුන්, ජ්‍යෙෂ්ඨ රාජ්‍ය නිලධාරීන් සහ සංවර්ධන හවුල්කරුවන්ගේ සහභාගිත්වයෙන් සිදු වන අතර වැරදි සමාජ සම්මත, ළමා විවාහ, ළමා ශ්‍රමය සූරාකෑම, දත්ත විෂමතා, සම්පත් සීමා සහ සමාජ මාධ්‍ය ඇතුළු නව තාක්ෂණික මෙවලම් හරහා සිදුවන ප්‍රචණ්ඩත්වය, අපයෝජනය සහ සූරාකෑම වැනි නැගී එන අභියෝගවලට විසඳුම් සෙවීම කෙරෙහි ද අවධානය යොමු කරනු ඇත.

මෙහිදී අදහස් දැක්වූ අග්‍රාමාත්‍ය ආචාර්ය හරිනි අමරසූරිය,

ළමුන්ට එරෙහිව සිදුවන ප්‍රචණ්ඩත්වය රටින් තුරන් කිරීම සඳහා ශ්‍රී ලංකාව ව්‍යුහාත්මක ප්‍රවේශයකට පිවිස ඇති බවත් ළමා ආරක්ෂාව හුදෙක් එක් ක්ෂේත්‍රයකට පමණක් සීමා වූ කරුණක් නොව, රටේ පුළුල් සංවර්ධන, යහපාලන සහ සමාජ සාධාරණතා න්‍යාය පත්‍රය තුළ අන්තර්ගත ජාතික ප්‍රමුඛතාවයක් වන බවත් අවධාරණය කළාය.

රටේ අධ්‍යාපන පද්ධතිය දරුවන් සඳහා අධ්‍යාපනය ලබා දෙනා ස්ථානයකට පමණක් සීමා නොවී ළමායාගේ ආරක්ෂාව සහතික කරන සුවිශේෂී ස්ථානයක් වන බව අග්‍රාමාත්‍යතුමිය සඳහන් කළාය.

වැඩිදුරටත් අදහස් දැක්වූ අග්‍රාමාත්‍යතුමිය,

අධ්‍යාපන පද්ධතිය ළමුන් බලගන්වන සුවිශේෂී පරිසරයක් නිර්මාණය කරනවා. පාසල් යනු ඉගෙනුම් ඉගැන්වීම් සඳහා සීමා වූ ස්ථාන පමණක් නොවේ, හානිකර තත්ත්වයන් කල්තියා හඳුනා ගනිමින්, මනෝසමාජීය සහාය ලබාදෙමින් දරුවන්ගේ ආරක්ෂාව සඳහා කැපවෙන වැදගත් ස්ථාන වනවා. උපදේශන සේවා සහ ආරක්ෂණ ක්‍රියාමාර්ග ඇතුළු පාසල් මට්ටමේ ළමා ආරක්ෂණ පද්ධති ශක්තිමත් කිරීමට අපි කැපවී සිටිනවා.

ළමුන්ට එරෙහි ප්‍රචණ්ඩත්වය වැළැක්වීමේදී කලාපීය සහයෝගීතාවයේ වැදගත්කම අවධාරණය කළ අග්‍රාමාත්‍යතුමිය, ළමා ආරක්ෂාව සම්බන්ධ අභියෝග ජාතික සීමාවන් ඉක්මවා යන බැවින් ඒවාට විසඳුම් සෙවීම සඳහා සාමූහික ක්‍රියාමාර්ග, අත්දැකීම් හුවමාරු කර ගැනීම සහ කලාපීය රටවල් අතර අඛණ්ඩ සහයෝගීතාව අත්‍යවශ්‍ය වන බව සඳහන් කළාය.

මෙම අවස්ථාවට සාක් සංවිධානයේ මහලේකම් Md. Golam Sarwar, ශ්‍රී ලංකාවේ යුනිසෙෆ් නියෝජිත Emma Brigham, ළමුන්ට එරෙහි ප්‍රචණ්ඩත්වය පිළිබඳ එක්සත් ජාතීන්ගේ මහලේකම්ගේ විශේෂ නියෝජිත Najat Maalla M’jid, කාන්තා හා ළමා කටයුතු අමාත්‍ය සරෝජා සාවිත්‍රි පෝල්රාජ්, නියෝජ්‍ය අමාත්‍ය ආචාර්ය නාමල් සුදර්ශන (පා.ම.) යන මහත්ම මහත්මීන් ඇතුළු අමාත්‍යවරුන්, රාජ්‍ය නිලධාරීන් සහ දේශීය හා ජාත්‍යන්තර නියෝජිතයින් රැසක් සහභාගී වූහ.

අග්‍රාමාත්‍ය මාධ්‍ය අංශය

සිය ධූර කාලය අවසන් කරන දකුණු ආසියානු කලාපීය සහයෝගිතා සංවිධානයේ (SAARC) මහලේකම් Golam Sarwar මහතා ජූනි 22 දින අරලියගහ මන්දිරයේදී අග්‍රාමාත්‍ය ආචාර්ය හරිනි අමරසූරිය හමුවිය.

මෙම හමුවේදී කලාපීය සහයෝගිතාව ප්‍රවර්ධනය කිරීම සහ සාර්ක් සංවිධානයේ අරමුණු ඉදිරියට ගෙන යාම සඳහා මහලේකම්වරයා විසින් සිදු කරනු ලැබූ සේවය අග්‍රාමාත්‍ය ආචාර්ය හරිනි අමරසූරිය පැසසුමට ලක් කළා ය.

2026 ජූනි 23 දින කොළඹදී පැවැත්වීමට නියමිත “ළමුන්ට එරෙහි හිංසනය අවසන් කිරීම පිළිබඳ අමාත්‍ය සමුළුව” සම්බන්ධයෙන් මෙහිදී විශේෂ අවධානය යොමු වූ අතර දකුණු ආසියාතික කලාපය තුළ දරුවන්ගේ අයිතිවාසිකම්, ආරක්ෂාව සහ යහපැවැත්ම තහවුරු කිරීම සඳහා කලාපීය මට්ටමෙන් ක්‍රියාමාර්ගවලට යොමු වීමේ වැදගත්කම පිළිබඳව ද අග්‍රාමාත්‍යතුමිය අවධාරණය කළාය.

සාර්ක් ලේකම් කාර්යාලය විසින් ක්‍රියාත්මක කරනු ලබන වැඩසටහන් සහ සාර්ක් රාමුව යටතේ ක්‍රියාත්මක වන ප්‍රධාන කලාපීය වැඩසටහන් පිළිබඳව මහලේකම්වරයා අග්‍රාමාත්‍යතමිය දැනුවත් කළ අතර විශේෂයෙන්ම, සාමාජික රටවල් අතර සහයෝගිතාව ශක්තිමත් කිරීම, ආහාර සුරක්ෂිතතාව වැඩිදියුණු කිරීම සහ ළමා පෝෂණය නංවාලීම සඳහා සාර්ක් සංවිධානය ගෙන යන ප්‍රයත්න පිළිබඳව ද අවධානය යොමු කළේ ය.

කලාපීය සම්බන්ධතා සහ සහයෝගිතාව තවදුරටත් ශක්තිමත් කිරීම සඳහා සාර්ක් සංවිධානය සහ අනෙකුත් කලාපීය සංවිධාන අතර සමීප සබඳතා ගොඩනැගීමේ වැදගත්කම ද අග්‍රාමාත්‍යතුමිය මෙහිදී පෙන්වා දුන්නාය.

සාර්ක් සංවිධානය සහ ශ්‍රී ලංකාව අතර පවතින දිගුකාලීන හවුල්කාරිත්වය යළි තහවුරු කළ අග්‍රාමාත්‍යතුමිය, කලාපීය සාමය සහ ජනතා කේන්ද්‍රීය සංවර්ධනය ප්‍රවර්ධනය කිරීම සඳහා සාර්ක් සංවිධානය ගෙන යන ප්‍රයත්නයන් සඳහා ශ්‍රී ලංකාවේ අඛණ්ඩ සහාය ලබාදෙන බව ද ප්‍රකාශ කළාය.

මෙම අවස්ථාවට කත්මණ්ඩුහි පිහිටි සාර්ක් ලේකම් කාර්යාලයේ අධ්‍යක්ෂ (ESC) වරුණ විල්පත, අග්‍රාමාත්‍ය ලේකම් ප්‍රදීප් සපුතන්ත්‍රි, අග්‍රාමාත්‍ය අතිරේක ලේකම් සාගරිකා බෝගහවත්ත යන මහත්ම මහත්මීන් සහ විදේශ කටයුතු, විදේශ රැකියා හා සංචාරක අමාත්‍යාංශයේ නිලධාරීන් පිරිසක් සහභාගී වූහ.

අග්‍රාමාත්‍ය මාධ්‍ය අංශය

ද්විත්වා සුළි කුණාටුවෙන් හානි වූ ස්ථාන ඇතුළු ඉදිරි සංවර්ධන කටයුතු සඳහා මේ වන විට රජයෙන් බොහෝ මුදලක් වෙන් කර ඇති බවත්, අදාළ ඉදිරි කිරීම් කටයුතුවලට අවශ්‍ය තාක්ෂණික නිලධාරින්ගෙන් සමන්විත මානව සම්පත් සපයා ගැනීම මේ වන විට මුහුණ දෙන අභියෝගයක් බවත් අග්‍රාමාත්‍ය ආචාර්ය හරිනි අමරසූරිය පැවසුවා ය.

මල්වතු, අස්ගිරි උභයවිහාරික මහා නාහිමිවරුන් බැහැ දකිමින් ජුන් 19වන දින මහනුවරදී අග්‍රාමාත්‍ය ආචාර්ය හරිනි අමරසූරිය මේ බව සඳහන් කළාය.

මහනුවර, මල්වතු මහා විහාරයේ වැඩවසන මල්වතු පාර්ශ්වයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල මහා නායක හිමිපාණන් වහන්සේ සහ මල්වතු පාර්ශ්වයේ අනුනායක හිමිවරුන් වන අතිපූජ්‍ය නියංගොඩ විජිතසිරි නාහිමියන් සහ අතිපූජ්‍ය දිඹුල්කුඹුරේ විමලධම්ම නාහිමියන් බැහැ දැකීමට පැමිණි අග්‍රාමාත්‍යතුමිය එහිදී සුහද සාකච්ඡාවක ද නිරත විය.

අනතුරුව ශ්‍රී ලංකාවේ සියම් මහා නිකායේ අස්ගිරි පාර්ශවයේ වත්මන් මහා නායක අතිපූජ්‍ය වරකාගොඩ ඥානරතන මහා නායක මාහිමිපාණන් වහන්සේ සහ අස්ගිරි පාර්ශ්වයේ අනුනායක නාරම්පනාවේ ආනන්ද නායක හිමියන්ද බැහැ දැකීමට අග්‍රාමාත්‍යතුමිය පැමිණියාය.

එහිදී වැඩිදුරටත් අදහස් දැක් වූ අග්‍රාමාත්‍යතුමිය නව අධ්‍යාපන ප්‍රතිසංස්කරණ වල වත්මන් තත්ත්වය පිළිබඳ උන්වහන්සේලා දැනුවත් කළ අතර පවතින ගුරු හිගය පියවීමට ඉදිරියේදී ගුරුවරුන් බඳවා ගැනීම සිදු කරන බවත්, පැවති ගුරු විභාගයේ පිළිතුරු පත්‍ර ඇගයීම මේ වන විට සිදු කරන අතර සමත්වන පිරිස ප්‍රායෝගික පරික්ෂණයකින් පසු කඩිනමින් බඳවා ගැනීමට කටයුතු තරන බව ද පැවසුවාය.

මෙම අවස්ථාවට පාර්ලිමේන්තු මන්ත්‍රීවරුන් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශයේ ලේකම් නාලක කලුවැව මහතා ඇතුළු පිරිසක් සහභාගී වූහ.

අග්‍රාමාත්‍ය මාධ්‍ය අංශය