හෙළ කලාකෙත අස්වද්දන්නට අනුපමේය මෙහෙවරක් කළ ප්‍රතිභාපූර්ණ කලාකරු ජැක්සන් ඇන්තනී මහතාගේ අභාවය සංවේගයට කරුණකි.
සිනමාව, වේදිකාව, රූපවාහිනිය දිග්විජය කරමින් පරිනත සටහන් තැබූ ඔහු දැයට එක්කළ සංස්කෘතික දායාදයන් බොහෝය. පරිසර, ඉතිහාස, මාධ්‍ය ගවේෂණයේ නවමු ඉසව් සොයාගොස් ඒවා ජනතාවට සමීප කරමින් ජන මනස අවදි කොට සකල කලාවන්හී සාරයන් උකහා සමාජගත කළ හර පද්ධතීන් ඉතා වටී.
විසල් පරාසයක අණසක පැතිර වූ ඔහු මතු පරපුරට අත්පොතක් බදු විය. ඔහුගේ අභාවය, හෙළ කලාවේ සෑම කුළකයකටම පිරිමැසිය නොහැකි පාඩුවක් හා පිරවිය නොහැකි රික්තයක් වනු ඇත.
ජැක්සන් ඇන්තනී මහතාගේ වියෝවෙන් ශෝකයට පත්, ඔහුගේ බිරිඳ කුමාරි මුණසිංහ, දූදරුවන් ඇතුළු ඥාති හිතමිත්‍රාදීන්, සහෝදර කලා ශිල්පීන් හා සහසම්බන්ධිත සැමට සංවේගය පළකරමි.
පිරිපුන් කලාවේදීයාණෙනි, ඔබට මොක් සුව !
දිනේෂ් ගුණවර්ධන (පා.ම)
අග්‍රාමාත්‍ය
ශ්‍රී ලංකා ප්‍රජාතාන්ත්‍රික සමාජවාදී ජනරජය
2023 ඔක්තෝම්බර් මස 09 දින