​ශ්‍රී ලංකා යුද හමුදාවේ 25 වැනි හමුදාපතිවරයා ලෙස සිය ධුර කාලය නිම කළ යුද හමුදාපති ලුතිනන් ජෙනරල් ලසන්ත රොද්‍රිගෝ මහතා, ජුලි 31 දින අරලියගහ මන්දිරයේදී අග්‍රාමාත්‍ය ආචාර්ය හරිනි අමරසූරිය හමුවුවා ය.

මෙම හමුවේදී ලුතිනන් ජෙනරල් ලසන්ත රොද්‍රිගෝ මහතා විසින් ඉටුකරන ලද විශිෂ්ට හමුදා සේවය, ආදර්ශමත් නායකත්වය මෙන්ම මාතෘ භූමිය උදෙසා දක්වන ලද කැපවීම අග්‍රාමාත්‍යතුමිය ඇගයීමට ලක් කළාය.

​සිය ධුර කාලය පුරාවට ශ්‍රී ලංකා යුද හමුදාවේ මෙහෙයුම් හැකියාවන් සහ වෘත්තීයමය ප්‍රමිතීන් උසස් මට්ටමකට ගෙන ඒම වෙනුවෙන් තමන් දැක්වූ සක්‍රිය දායකත්වය හිටපු යුද හමුදාපතිතුමන් මෙහිදී යළි සිහිපත් කළේය.

අනතුරුව සේවයෙන් නික්ම ගිය යුද හමුදාපතිතුමන්ගේ ඉදිරි කටයුතු වෙනුවෙන් අග්‍රාමාත්‍යතුමිය සිය සුබපැතුම් එක් කළාය.

අග්‍රාමාත්‍ය මාධ්‍ය අංශය

2030 වසර වන විට මෙරටට පැමිණෙන සංචාරකයින් සංඛ්‍යාව මිලියන පහ දක්වා ඉහළ නැංවීමත්, සංචාරක ක්ෂේත්‍රයේ රැකියා නියුක්තිකයන් සංඛ්‍යාව 800,000 දක්වා වර්ධනය කිරීමත් සහ ඩොලර් බිලියන 10ක ආදායමක් උපයා ගැනීම රජයේ ’2030 ජාතික සංචාරක දැක්ම’ හි ප්‍රධාන අරමුණ බව අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.

අග්‍රාමාත්‍යවරිය මේ බව සඳහන් කළේ ජූලි 31 වන දින බණ්ඩාරනායක සම්මන්ත්‍රණ ශාලාවේ (BMICH) පැවැති ශ්‍රී ලංකා සංචාරක හා හෝටල් කළමනාකරණ ආයතනයේ (SLITHM) 45 වන උපාධි ප්‍රදානෝත්සවයේ ප්‍රධාන ආරාධිතයා ලෙස එක්වෙමිනි.

1964 වසරේදී ’ලංකා හෝටල් පාසල’ ලෙස ආරම්භ කෙරුණු ශ්‍රී ලංකා සංචාරක හා හෝටල් කළමනාකරණ ආයතනය, වසර 60කට වැඩි කාලයක් පුරා දේශීය හා ජාත්‍යන්තර වශයෙන් ඇගයීමට ලක්වූ වෘත්තිකයන් ක්ෂේත්‍රයට දායාද කිරීමට සක්‍රියව දායක වී තිබේ. මෙම උත්සවයේදී පාඨමාලා සාර්ථකව නිමකළ සිසුන් වෙත සහතිකපත්‍ර හා සම්මාන පිරිනැමීම ද අග්‍රාමාත්‍යතුමිය අතින් සිදු විය.

අනතුරුව පැමිණ සිටි පිරිස ඇමතූ අග්‍රාමාත්‍යතුමිය, ’දිට්වා’ සුළිකුණාටුව ඇතුළු විවිධ අභියෝග හමුවේ වුවද ශ්‍රී ලංකාවේ සංචාරක ක්ෂේත්‍රය ප්‍රශංසනීය ලෙස නැගී සිටි බවත්. මෙ වන විට සංචාරක ක්ෂේත්‍රය ආර්ථිකය නැවත ගොඩනැගීමේ ප්‍රධාන බලවේගයක් බවට පත්ව ඇති අතර, 2025 වසරේදී සංචාරක ක්ෂේත්‍රයෙන් උපයාගත් ආදායම ඇමෙරිකානු ඩොලර් බිලියන 3.2ක් පමණ වන බවත් පැවසුවාය.

එමෙන්ම 2026 ජනවාරි සිට ජූලි දක්වා කාලය තුළ සංචාරකයින් මිලියන 1.3 කට අධික සංඛ්‍යාවක් මෙරටට පැමිණ ඇති අතර, ක්ෂේත්‍රයේ සෘජු හා වක්‍ර රැකියා නියුක්තිය ද 429,000 ඉක්මවා තිබෙන බවද පැවසීය.

අනාගත ඉලක්ක සපුරා ගැනීමට තාක්ෂණික දැනුම මෙන්ම පාරිසරික වගකීම, වෘත්තීය ගෞරවය, වෙනස්වීම්වලට හැඩගැසීමේ හැකියාව සහ ගුණාත්මක සේවාවක් සැපයීමට කැපවූ වෘත්තිකයන් ක්ෂේත්‍රයට අවශ්‍ය වන බව අග්‍රාමාත්‍යතුමිය මෙහිදී අවධාරණය කළාය. ආබාධිත පුද්ගලයන්ට ද සංචාරක ක්ෂේත්‍රයේ අවස්ථා නිර්මාණය කරදීමට SLITHM ආයතනය ගෙන ඇති පියවර පැසසුමට ලක් කළ අග්‍රාමාත්‍යතුමිය සුරක්ෂිත සේවා පරිසරයක් තුළ කාන්තා සහභාගීත්වය ඉහළ නැංවීමේ වැදගත්කම ද පෙන්වා දුන්නාය.

මෙම අවස්ථාවට සංචාරක නියෝජ්‍ය අමාත්‍ය මහාචාර්ය රුවන් රණසිංහ, සංචාරක අමාත්‍යාංශයේ ලේකම් ධීර හෙට්ටිආරච්චි, SLITHM සභාපති වසන්ත මන්ත්‍රීපාල යන මහත්වරුන් ඇතුළු ආයතනයේ අධ්‍යක්ෂ ජනරාල්, රාජ්‍ය තාන්ත්‍රිකයන්, ආචාර්ය මණ්ඩලය සහ උපාධිධාරීන්ගේ පවුල්වල සාමාජිකයෝ රැසක් එක්ව සිටියහ.

අග්‍රාමාත්‍ය මාධ්‍ය අංශය

එක්සත් ජාතීන්ගේ සංවිධානයේ සහකාර මහලේකම් සහ එක්සත් ජාතීන්ගේ සංවර්ධන වැඩසටහනේ (UNDP) ආසියා පැසිෆික් කලාපය සඳහා වන අධ්‍යක්ෂ කන්නි විග්නරාජා මහත්මිය ජූලි 31 වන දින අග්‍රාමාත්‍ය කාර්යාලයේදී අග්‍රාමාත්‍ය ආචාර්ය හරිනි අමරසූරිය හමුවිය.

එක්සත් ජාතීන්ගේ සංවර්ධන වැඩසටහනේ නියෝජිත පිරිස පිළිගත් අග්‍රාමාත්‍යතුමිය, ශ්‍රී ලංකාවේ තිරසාර සංවර්ධන ක්‍රියාමාර්ග වෙනුවෙන් UNDP සංවිධානය ලබාදෙන අඛණ්ඩ සහයෝගය සහ හවුල්කාරිත්වය ඇගයීමට ලක් කළාය.

පසුගිය රජයන් විසින් ආරම්භ කරන ලද වැඩසටහන් අවසන් කිරීමට මෙන්ම වර්තමාන රජයේ ප්‍රතිපත්තිමය ප්‍රමුඛතාවන් ඉදිරියට ගෙනයාමට ගෙන ඇති පියවර පිළිබඳව අග්‍රාමාත්‍යතුමිය මෙහිදී නියෝජිත පිරිස දැනුවත් කළාය.

රාජ්‍ය අංශයේ සමාලෝචන ක්‍රියාවලිය, විනිවිදභාවයෙන් සහ දක්ෂතාව පදනම් කරගත් ක්‍රමවේදයන් ඔස්සේ බඳවා ගැනීම් සහ රාජ්‍ය අංශය තුළ මානව සම්පත් කළමනාකරණය ඉහළ නැංවීමට ගෙන ඇති වැඩපිළිවෙළ පිළිබඳව මෙහිදී විශේෂ අවධානය යොමු විය.

එමෙන්ම ඩිජිටල් රාජ්‍ය යටිතල පහසුකම්, ඩිජිටල් පාලනය සහ රාජ්‍ය සේවා සැපයීම කාර්යක්ෂම කිරීම සඳහා තාක්ෂණය භාවිත කිරීම ඇතුළු රජය ගෙන ඇති ඩිජිටල්කරණ ක්‍රියාවලිය පිළිබඳවද මෙහිදී සාකච්ඡා කෙරිණි.

ශ්‍රී ලංකාවේ ඩිජිටල්කරණය සහ ඩිජිටල් පාලන පියවර සඳහා මෙන්ම රටේ ආර්ථිකය යථා තත්ත්වයට පත් කිරීම සහ ආර්ථික ස්ථාවරභාවය ගොඩනැගීමේ කාර්යය සඳහා අඛණ්ඩව සහය දෙන බවට විග්නරාජා මහත්මිය මෙහිදී අවධාරණය කළා ය.

සංයුක්ත අපද්‍රව්‍ය කළමනාකරණය ශක්තිමත් කිරීම, තිරසාර පාරිසරික සම්පත් කළමනාකරණය, පුනර්ජනනීය බලශක්ති උත්පාදනය ව්‍යාප්ත කිරීම සහ තිරසාර සංවර්ධනය කරා යන ගමන වේගවත් කිරීම කෙරෙහි රජයේ අවධානය යොමු වී ඇති බව අග්‍රාමාත්‍යතුමිය මෙහිදී පෙන්වා දුන්නාය.

කාලගුණික විපර්යාසයන්ට ඔරොත්තු දීම සහ අඩු කාබන් විමෝචනයක් උදෙසා අරමුදල් රැස්කිරීම සඳහා වූ පුළුල් දේශගුණික මුල්‍ය උපායමාර්ගයක් සකස් කිරීමට ගෙන ඇති ක්‍රියාමාර්ග පිළිබඳවද අග්‍රාමාත්‍යතුමිය පැහැදිලි කළාය.

අනාගත ලෝකයේ බිහිවෙමින් තිබෙන රැකියා වෙළඳපොළ අවශ්‍යතා හඳුනා ගැනීමටත්, අනාගත ආර්ථික ඉල්ලුමට සරිලන පරිදි කුසලතා සංවර්ධනයට සහය වීමටත් UNDP සංවිධානය මගින් දැනට සිදුකරනු ලබන ’Future Skills Study’ පිළිබඳ යාවත්කාලීන තොරතුරු ද මෙහිදී ඉදිරිපත් කෙරිණි.

තවද, ශ්‍රී ලංකාවේ ’සුරක්ෂා ආර්ථිකය’ (care economy) වැඩිදියුණු කිරීම, කාන්තා ශ්‍රමදායකත්වය ඉහළ නැංවීම සහ වඩාත් අන්තර්ග්‍රහණය වූ ආර්ථික වර්ධනයක් ප්‍රවර්ධනය කිරීම පිළිබඳවද දෙපාර්ශවය අතර අදහස් හුවමාරු විය.

මෙම අවස්ථාවට ශ්‍රී ලංකාවේ UNDP නේවාසික නියෝජිත Azusa Kubota මහත්මිය, නියෝජ්‍ය නේවාසික නියෝජිත Marina Ten මහත්මිය, අග්‍රාමාත්‍ය ලේකම් ප්‍රදීප් සපුතන්ත්‍රි මහතා, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය සහ විදේශ කටයුතු, විදේශ රැකියා සහ සංචාරක අමාත්‍යාංශයේ නිලධාරීන් පිරිසක් සහභාගී වූහ.

අග්‍රාමාත්‍ය මාධ්‍ය අංශය

ආර්ථික වශයෙන් වැදගත් කර්මාන්තශාලා, උසස් අධ්‍යාපන ආයතන ඇතුළු ස්ථාන රාශියකට ප්‍රවේශ පහසුකම් සපයන රත්මලාන කඳවල මාර්ගය සහ දෙපස කානු පද්ධතියේ ප්‍රතිසංස්කරණ කටයුතු කඩිනමින් ආරම්භ කරන ලෙස අග්‍රාමාත්‍ය ආචාර්ය හරිනි අමරසූරිය අදාළ බලධාරීන්ට උපදෙස් ලබා දුන්නාය.

අග්‍රාමාත්‍යතුමියගේ ප්‍රධානත්වයෙන් අද (31) දින බස්නාහිර පළාත් සභා කාර්යාලයේදී පැවැති විශේෂ සාකච්ඡාවකදී අග්‍රාමාත්‍යතුමිය මේ බව පැවසුවාය.

මාර්ගය දෙපස පිහිටි කානු පද්ධතියේ පවතින අවහිරතා හේතුවෙන් වර්ෂා කාලයේදී මාර්ගය සහ දෙපස ගොඩනැගිලි නිරන්තරයෙන් ජලයෙන් යටවන අතර එමගින් ප්‍රදේශවාසීන්, ආයතන වෙත පැමිණෙන සේවාලාභීන් සහ සේවකයන් ඇතුළු විශාල පිරිසක් දැඩි අපහසුතාවට පත්වෙන බවත්, මාර්ගය ප්‍රතිසංස්කරණය කිරීම තුළින් විශාල ආර්ථික හා සමාජීය ප්‍රතිලාභ රැසක් අත්වන නමුත්, වසර ගණනාවකින් නිසි නඩත්තුවක් සිදු නොවීම නිසා ජල ගැලීම්වලට හේතුවන අනවසර ඉදිකිරීම් පවා සිදුව ඇති බවත් මෙහිදී අනාවරණය විය.

රත්මලාන කඳවල මාර්ගයේ ජල බැසයාම නිසි පරිදි සිදු නොවීමට බලපා ඇති ප්‍රධාන හේතු කිහිපයක් සාකච්ඡාවේදී හඳුනා ගැනුණ අතර වැසි ජලය බැසයාමට බාධා වන ලෙස සිදුකර ඇති අනවසර ඉදිකිරීම්, කානු පද්ධතිය නිසියාකාරව සුද්ධ පවිත්‍ර කර නඩත්තු නොකිරීම සහ පවතින බෝක්කු හා පාලම් වර්තමාන අවශ්‍යතාවලට සරිලන පරිදි විශාල නොවීම ඒ අතර ප්‍රධාන වේ.

එමෙන්ම ජලය ගලාබසින වේරැස්ස ගඟෙහි සහ කානු පද්ධතියේ පිහිටීම අතර උසෙහි පරතරය අවම වීම මෙන්ම ප්‍රදේශයේ භූගත ජල මට්ටම පොළොව මතුපිට ස්තරයට ඉතා ආසන්නයෙන් පිහිටීම ද මෙම ජල ගැලීම් තත්ත්වයට හේතු වී ඇති බව මෙහිදී අනාවරණය විය.

මෙහිදී අදහස් දැක්වූ අග්‍රාමාත්‍යතුමිය සඳහන් කළේ, අදාළ ඉඩම්වල අයිතිය පිළිබඳ පවතින ගැටලු සහ කානු පද්ධතියේ හා ඇළ මාර්ගවල නඩත්තු කටයුතු අයත් ආයතන නිවැරදිව හඳුනා නොගැනීම මෙම අර්බුදය විසඳීමට ප්‍රබල බාධාවක් වී ඇති බවයි. එබැවින් පටු ආයතනික හා රාජකාරී සීමාවල නොසිට සියලුම රාජ්‍ය ආයතන ඒකාබද්ධව එක්ව කටයුතු කිරීමේ වැදගත්කම අග්‍රාමාත්‍යතුමිය අවධාරණය කළාය.

ජනතාවට, විදේශ විනිමය උපයන කර්මාන්තශාලාවලට මෙන්ම උසස් අධ්‍යාපන ආයතනවලට සේවයක් සැලසෙන පරිදි සකස් කෙරෙන අවසාන සැලසුමට ප්‍රදේශයේ ගංවතුර පාලනය කිරීමද අනිවාර්යයෙන්ම ඇතුළත් විය යුතු බව අග්‍රාමාත්‍යතුමිය වැඩිදුරටත් පැවසුවාය.

ශ්‍රී ලංකා ඉඩම් සංවර්ධනය කිරීමේ සංස්ථාව විසින් මේ වන විටත් මෙයට අදාළ සැලසුමක් සකස් කර ඇති අතර, පාර්ශ්වකාර ආයතන එක්ව ගැටලු නිරාකරණය කරගැනීමෙන් පසු බස්නාහිර පළාත් මාර්ග සංවර්ධන අධිකාරිය විසින් සංවර්ධන කටයුතු සිදු කිරීම පිළිබඳවද මෙහිදී අවධානය යොමු විය.

මෙම සාකච්ඡාව සඳහා කොළඹ දිස්ත්‍රික් සම්බන්ධීකරණ කමිටුවේ සභාපති පාර්ලිමේන්තු මන්ත්‍රී ලක්ෂමන් නිපුණආරච්චි, රත්මලාන සම්බන්ධීකරණ කමිටුවේ සභාපතිනි පාර්ලිමේන්තු මන්ත්‍රීනි සමන්මලී ගුණසිංහ, කොළඹ දිස්ත්‍රික් සම්බන්ධීකරණ කමිටුවේ මාර්ග අනුකමිටු සභාපති පාර්ලිමේන්තු මන්ත්‍රී දේවානන්ද සුරවීර, බස්නාහිර පළාත් ප්‍රධාන ලේකම්, දෙහිවල-ගල්කිස්ස නගරාධිපති ඇතුළු ශ්‍රී ලංකා ඉඩම් සංවර්ධනය කිරීමේ සංස්ථාව සහ පළාත් මාර්ග සංවර්ධන අධිකාරිය නියෝජනය කරමින් රාජ්‍ය නිලධාරීන් විශාල පිරිසක් එක්ව සිටියහ.

අග්‍රාමාත්‍ය මාධ්‍ය අංශය

අග්‍රාමාත්‍ය ආචාර්ය හරිනි අමරසූරිය, ජෝර්ජ් කීට් පදනම සහ කොළඹ බ්‍රිතාන්‍ය මහකොමසාරිස් කාර්යාලය එක්ව සංවිධානය කළ “19th Century Views of Ceylon” චිත්‍ර ප්‍රදර්ශනයේ සමාරම්භක අවස්ථාවට 2026 ජූලි 30 වැනිදා බ්‍රිතාන්‍ය මහකොමසාරිස්වරයාගේ නිල නිවස වන වෙස්ට්මින්ස්ටර් හවුස්හිදී එක් වූවාය.

වෙස්ට්මින්ස්ටර් හවුස්හි මහජනතාව සඳහා පැවැත්වෙන ප්‍රථම කලා ප්‍රදර්ශනය ලෙස මෙම ප්‍රදර්ශනය ඓතිහාසික සන්ධිස්ථානයක් සනිටුහන් කරයි. මෙහි 19 වැනි සියවසේ ශ්‍රී ලංකාව නිරූපණය කරන ලද සුප්‍රකට බ්‍රිතාන්‍ය චිත්‍ර ශිල්පීන් වන එඩ්වඩ් ලියර් (Edward Lear), ඇන්ඩෲ නිකොල් (Andrew Nicholl) සහ කොන්ස්ටන්ස් ගෝර්ඩන් කමිං (Constance Gordon Cumming) ඇතුළු කලාකරුවන්ගේ දුර්ලභ සිතුවම් එකතුවක් ප්‍රදර්ශනය කෙරේ. පෞද්ගලික අන්තර්ගතකිරීම් වැඩි වශයෙන් සමන්විත මෙම කෘති අතරින් බොහෝමයක් ප්‍රථම වරට මහජන ප්‍රදර්ශනයට එක්කර ඇති අතර, එමගින් 19 වැනි සියවසේ මෙරට භූ දර්ශන, ගෘහ නිර්මාණ ශිල්පය සහ සංස්කෘතික උරුමය විදේශීය කලාකරුවන්ගේ දෘෂ්ටිකෝණයෙන් දෘශ්‍යමය ලෙස සටහන් කර ඇත.

ප්‍රදර්ශනය නැරඹූ අග්‍රාමාත්‍ය ආචාර්ය හරිනි අමරසූරිය මහත්මිය, සංවිධායකයන් සහ ආරාධිත අමුත්තන් සමඟ සංස්කෘතික උරුමය සංරක්ෂණය කිරීමේ වැදගත්කම සහ කලා මාධ්‍යය ඔස්සේ ජාත්‍යන්තර සංස්කෘතික සහයෝගීතාව ශක්තිමත් කිරීම පිළිබඳ අදහස් හුවමාරු කර ගත්තාය.

ජෝර්ජ් කීට් පදනම සහ කොළඹ බ්‍රිතාන්‍ය මහකොමසාරිස් කාර්යාලය එක්ව සංවිධානය කළ මෙම ප්‍රදර්ශනය, ශ්‍රී ලංකාව සහ එක්සත් රාජධානිය අතර දිගුකාලීන සංස්කෘතික හා ඓතිහාසික සබඳතා පිළිබිඹු කරන අතරම, ශ්‍රී ලංකාවේ සුවිශේෂී කලා උරුමය පිළිබඳ ගැඹුරු ඇගයීමක් ප්‍රවර්ධනය කිරීම ද අරමුණු කරයි.

ශ්‍රී ලංකාවේ බ්‍රිතාන්‍ය මහකොමසාරිස් ඇන්ඩෲ පැට්‍රික් මහතා, ජෝර්ජ් කීට් පදනමේ සභාපති මලක තල්වත්ත මහතා, ජෝර්ජ් කීට් පදනමේ නියෝජිතයන්, රාජ්‍ය තාන්ත්‍රික ප්‍රජාවගේ සාමාජිකයන්, කලාකරුවන්, සංස්කෘතික ක්ෂේත්‍රයේ ප්‍රවීණයන් සහ ආරාධිත අමුත්තන් ඇතුළු පිරිසක් මෙම අවස්ථාවට එක්ව සිටියහ.

අග්‍රාමාත්‍ය මාධ්‍ය අංශය

ඒ සඳහා ඔවුන්ට අවස්ථා තිබෙන බවට විශ්වාසය ගොඩ නැගීම සහ එය යථාර්ථයක් කිරීම සඳහා අවස්ථාව සැලසිය යුතුයි.

රටක්, සමාජයක් දියුණු වීමට නම් කුසලතා සහ දැක්මක් ඇති තරුණ පරපුරක් අවශ්‍ය බවත්, ඒ සඳහා ඔවුන්ට අවස්ථා තිබෙන බවට විශ්වාසය ගොඩ නැගීම සහ එය යථාර්ථයක් කිරීම සඳහා අවස්ථාව සැලසිය යුතු බවත් අග්‍රාමාත්‍ය ආචාර්ය හරිනි අමරසූරිය පැවසුවාය.

කොළඹ නගරාධිපති නිල නිවසේදී Sri Lanka Skills Expo 2026 අධ්‍යාපනික ප්‍රදර්ශනය නිල වශයෙන් ප්‍රකාශයට පත් කිරීමේ අවස්ථාවට එක් වෙමින් ජූලි 30 වන දින අග්‍රාමාත්‍යතුමිය මේ බව සඳහන් කළාය.

’Skills for life’ යන තේමාව යටතේ සිව් වන වරටත් සංවිධානය කරන Sri Lanka Skills Expo 2026 අධ්‍යාපනික ප්‍රදර්ශනය අධ්‍යාපන, උසස් අධ්‍යාපන සහ වෘත්තිය අධ්‍යාපන අමාත්‍යාංශය, කෘෂි ආංශික නිපුණතා සභාව, කර්මාන්ත නිපුණතා සභාව සහ තෘතියික හා වෘත්තීය අධ්‍යාපන ‍‍‍‍කොමිෂන් සභාව සමඟ එක්ව සංවිධානය කර තිබේ.

Sri Lanka Skills Expo 2026 ප්‍රදර්ශනය ඔක්තෝම්බර් 23, 24 සහ 25 යන දිනයන්හි කොලඹ 07, විහාරමහා දේවි උද්‍යානය පරිශ්‍රය තුළ පැවැත්වීමට කටයුතු සූදානම් කර ඇත.

මෙම අවස්ථාවට සහභාගී වෙමින් අදහස් දැක්වූ අග්‍රාමාත්‍යතුමිය, රටක්, සමාජයක් දියුණු වීමටන නම් කුසලතා සහ දැක්මක් ඇති තරුණ පරපුරක් අවශ්‍ය බවත් ඒ සඳහා ඔවුන්ට අවස්ථා තිබෙන බවට විශ්වාසය ගොඩ නැගීම සහ එය යථාර්ථයක් කිරීම සඳහා අවස්ථාව සැලසිය යුතු බවත් අවධාරණය කළා ය.

ඉදිරි වසර කිහිපය තුළ අධ්‍යාපන ක්ෂේත්‍රය සඳහා ආයෝජන, විශේෂයෙන් ම වෘත්තිය අධ්‍යාපනය සඳහා විශාල ලෙස ආයෝජන සිදු කරමින් සිටින බවත්, එය සංකල්පයකින් එහාට ගොස් ක්‍රියාත්මක කිරීමට ද මෙහෙයුම් කමිටුවක් පත් කර ඇති බවද තැවදුරටත් අග්‍රාමාත්‍යතුමිය සඳහන් කළා ය.

වෘත්තිය අධ්‍යාපනය විකල්ප තේරීමක් යන මතය නැති කළ යුතු බවත් සියලු විෂය ක්ෂේත්‍රයක්ම රැකියා අවස්ථා මෙන්ම ආර්ථික, සමාජ සංවර්ධනයට සම්බන්ධයට මෙන්ම පුද්ගලික දියුණුවට ද සම්බන්ධ වන බව අග්‍රාමාත්‍යතුමිය පැවසුවා ය.

මෙවැනි අධ්‍යාපනික ප්‍රදර්ශනයක් රටේ සංවර්ධනයට මෙන්ම සමාජ දියුණුව සඳහා අවස්ථාවක් විය යුතු බව ද තවදුරටත් අග්‍රාමාත්‍යතුමිය අවධාරණය කළා ය.

රටේ තරුණ පරපුරට විශේෂයෙන්ම සියලු ප්‍රදේශවල සිටින පාසල් සිසුන් හට මෙම අවස්ථාවට සහභාගි වීම සඳහා අවස්ථාව උදා කර දීම සඳහා රජය කටයුතු ක්‍රියාත්මක කිරීමට කැපවී සිටින බව ද අග්‍රාමාත්‍යතුමිය මෙහිදී සඳහන් කළා ය.

මෙම අවස්ථාවට කොළඹ නගාරාධිපති ව්‍රායි කැලී බල්තසාර් මහත්මිය රාජ්‍ය තාන්ත්‍රික නියෝජිතයින්, සංවර්ධන පාර්ශවකරුවන් ඇතුළු පිරිසක් සහභාගී වූහ.

අග්‍රාමාත්‍ය මාධ්‍ය අංශය